Kritika nga Franca: Kilian Mbape, përgjegjës kryesor për fillimin e keq të Realit
Vite në pritje të mbërritjes së Kilian Mbapes te Real Madridi dhe kur ëndrra u realizua, më në fund, performanca e tij dhe e skuadrës së bardhë në përgjithësi filloi të vihej në dyshim, si në La Liga ashtu edhe në Ligën e Kampionëve
“Nokaut teknik” në shtëpi ndaj Milanit ka bërë shumë dëme dhe kritikat janë shumëfishuar. Një ish-lojtar i PSZH-së, i cili zakonisht nuk e “kafshon gjuhën” si komentues, ishte i ashpër me sulmuesin francez. Xherom Roten vuri në dukje disa gjëra.
“Ai ishte ylli i verës. Real Madridi fitoi gjithçka sezonin e kaluar, me një ekip dhe lojtarë që treguan guxim në fushë. Fatkeqësisht, kam përshtypjen se e gjitha kjo është zhdukur. Kilian i simbolizon të gjitha këto. Prania e tij i frustron disa. Të tjerët kanë ndryshuar pozicione, ose nuk luajnë më”.
Ka një kohë për t’u përshtatur, por kur je ndër lojtarët më të mirë në botë, kjo duhet të ndodhë shpejt. Jemi në nëntor dhe për momentin ai po regresohet. Personalisht konstatoj se aktivizimi si ‘9’ i ka përkeqësuar paraqitjet e tij.
Kilian po bën gjëra që janë krejtësisht të kundërta me atë që kërkon loja e futbollit. Kjo krijon ego në dhomat e zhveshjes. Ai është një barrë, po, po një barrë. Fatkeqësisht, Mbappe është përgjegjës kryesor për fillimin e keq sezonal të Real Madridit,” tha mes tjerash ish reprezentuesi i Francës.
