Izraeli i vret binjakët 3 ditësh, babai në shok: Kisha shkuar të tërhiqja certifikatat e lindjes
Binjakë të porsalindur u vranë dje në një sulm ajror izraelit në pjesën qendrore të Rripit të Gazës, teksa babai i tyre kishte shkuar për të marrë certifikatat e tyre të lindjes.
Dy foshnjat lindën të shtunën në qytetin Deir al-Balah, por një goditje izraelite në banesën e tyre shkatërroi gëzimin e familjes për të sapolindurit e tyre.
“Sapo kam marrë certifikatat e lindjes për foshnjat e mia të porsalindura Aysel dhe Aser”, tha babai i tyre Mohammad Abu al-Qumsan për Anadolu teksa lotët i rridhnin në faqe, duke shtuar:
“Ata kanë lindur më 10 gusht. Unë isha jashtë shtëpisë, duke përfunduar dokumentet dhe më pas mora një telefonatë… Nuk prisja t’i gjeja të gjithë të vdekur”.
Binjakë të porsalindur vriten në sulmin izraelit në Gaza teksa babai po u merrte certifikatat e lindjes https://t.co/crusDXfXoS pic.twitter.com/MlQ0BurM9R
— Anadolu Shqip (@aa_albanian) August 14, 2024
Mohammad dhe gruaja e tij, Jumana Arafa, të cilët ishin zhvendosur nga Gaza veriore, mirëpritën binjakët e tyre në botë pas një lindjeje të vështirë cezariane. Zemrat e tyre u mbushën me gëzim dhe çifti mezi prisnin të ardhmen me dy të vegjlit e tyre.
Teksa ai nxitoi të martën herët për të marrë certifikatat e lindjes për fëmijët e tij, ai mori një telefonatë shkatërruese ku u informua se bombardimet izraelite kishin shënjestruar banesën ku po qëndronte familja e tij.
Me zemrën që i rrihte shpejt dhe tmerri që e pushtonte, Muhamedi nxitoi në Spitalin e Dëshmorëve Al-Aksa në Deir al-Balah, ku gjeti të konfirmuar frikën e tij më të keqe.
I shembur nga pikëllimi nga pamja e familjes së tij të mbledhur jashtë morgut, babai kuptoi se mes viktimave ishin edhe gruaja e tij dhe binjakët e tyre të porsalindur.
“Aysel dhe Aser ishin fillimi dhe fundi i gëzimit tim. Lumturia ime ishte e paplotë dhe tani ajo është zhdukur”, tha babai.
– Tragjedi të panumërta
Përtej dhomës, vëllai i Jumanas vajtonte për nënën e tij, Rim Jamal al-Batraoui, 50 vjeçe, e cila gjithashtu u vra në sulm.
Ndërsa mbante trupin e nënës së tij dhe vështroi motrën dhe fëmijët e saj, ai me lot pyeti: “Cili ishte krimi i tyre? Pse ushtria izraelite i vuri në shënjestër?”
Sulmi ishte pjesë e ofensivës së vazhdueshme të Izraelit në Rripin e Gazës, ku janë vrarë afro 40.000 njerëz që nga 7 tetori 2023.
Vrasja e binjakëve të porsalindur ishte një nga tragjeditë e panumërta që kanë ndodhur në mes të luftës izraelite, duke lënë familje si ajo e Muhamedit pa asgjë veç kujtimeve të njerëzve të dashur që humbën.
Më shumë se dhjetë muaj pas luftës izraelite, pjesë të mëdha të Gazës qëndrojnë në gërmadha, krahas një bllokade paralizuese të ushqimit, ujit të pastër dhe ilaçeve.
Izraeli akuzohet për gjenocid në Gjykatën Ndërkombëtare të Drejtësisë, e cila e urdhëroi atë të ndalojë menjëherë operacionin e tij ushtarak në qytetin jugor Rafah, ku më shumë se 1 milion palestinezë kishin kërkuar strehim nga lufta përpara se të pushtohej më 6 maj.
