Irani akuzon BE-në se po sillet si “avokate” e Izraelit

Zëdhënësi i Ministrisë së Jashtme të Iranit ka akuzuar Bashkimin Evropian se po vepron si një “avokate” e Izraelit, pasi shefja e politikës së jashtme të BE-së, Kaja Kallas, shprehu shqetësim për programin bërthamor të Teheranit.

Në një postim në platformën X, Esmaeil Baghaei iu drejtua drejtpërdrejt Kallasit, duke i bërë thirrje: “Ju lutem ndaloni së vepruari si avokate e agresorit.”

Ai shtoi gjithashtu: “Si mund të shprehni shqetësim për programin paqësor të Iranit, i cili është nën inspektimin më rigoroz të IAEA-s, dhe njëkohësisht të injoroni faktin që regjimi izraelit zotëron një arsenal të madh armësh bërthamore?!”

Baghaei rikonfirmoi qëndrimin e Iranit se programi i tij bërthamor është tërësisht paqësor.

Ndërkohë që Irani është nënshkrues i Traktatit për Mospërhapjen e Armëve Bërthamore (NPT), Izraeli nuk është palë në të dhe besohet gjerësisht se zotëron armë bërthamore – ndonëse nuk e ka pranuar këtë publikisht.

“Irani nuk ka synuar kurrë armë bërthamore,” shtoi Baghaei, “për dallim nga agresori, i cili mbetet pengesa e vetme për një Lindje të Mesme të çliruar nga armët bërthamore – një objektiv që Irani e ka mbështetur që nga viti 1974.”