Dita e 18-të e protestës, qytetarët mblidhen para Kryeministrisë. ‘Flamingot’ marshojnë mes turmës
Edhe këtë të mërkurë vijon protesta e qytetarëve kundër ndërtimit në Zvërnec. Ndryshe nga 17 ditët e mëparshme të protestës, qytetarët nga kjo e mërkurë janë mbledhur në sheshin “Skëndërbej” në orën 19:00 për shkak të temperaturave të larta.
Grumbullimi ka filluar në orarin e ri ndërsa qytetarë marshuan drejt Kryeministrisë. Ata shihen me pankarta dhe flamuj në duar teksa kanë bërë thirrje qytetarëve të bashkohen në protestë.
Qytetarët ndër të tjera kanë bërë thirrje për dorëheqjen e kryeministrit Edi Rama. Ashtu si edhe në protestat e mëparshme shihen prindër me karroca me fëmijët e tyre të mitur. Protestë është zhvilluar edhe në qytetin e Elbasanit. Pas qëndrimit para Kryeministrisë, qytetarët pritet të nisin edhe marshimin nëpër rrugët e Tiranës e cila zgjat deri pranë mesnatës.
