OKB paralajmëron për rritjen e rrezikut të përhapjes së sëmundjeve mes personave të zhvendosur në Jemen
OKB-ja ka paralajmëruar për rritjen e rrezikut të përhapjes së sëmundjeve mes personave të zhvendosur, në kushtet e përshkallëzimit të vazhdueshëm ushtarak në Jemen, duke bërë thirrje për rritjen e mbështetjes humanitare dhe financimit, transmeton Anadolu.
Zyra e OKB-së për Koordinimin e Çështjeve Humanitare (OCHA) tha në rrjetin social amerikan X se ekipet humanitare po vazhdojnë të ofrojnë ndihmë jetike për civilët e zhvendosur dhe të prekur nga luftimet.
“Por me dhjetëra mijëra persona të zhvendosur dhe rritjen e rrezikut të përhapjes së sëmundjeve, organizatat humanitare kanë nevojë për mbështetje urgjente, përfshirë financim dhe qasje të sigurt e të papenguar”, tha OCHA.
Më herët, Njësia Ekzekutive e Jemenit për Menaxhimin e Kampeve të Personave të Zhvendosur tha se numri i njerëzve të zhvendosur nga përshkallëzimi ushtarak që nga korriku është rritur në afro 198 mijë.
Zhvendosja po ushtron presion shtesë mbi shërbimet shëndetësore dhe humanitare në një vend që tashmë po përballet me përkeqësim të gjerë të sistemit shëndetësor, si dhe me mungesa të ushqimit, ujit dhe shërbimeve sanitare.
Në fund të muajit të kaluar, Fondi i OKB-së për Fëmijët (UNICEF) paralajmëroi se kequshqyerja akute te fëmijët po rritej ndërsa luftimet po intensifikoheshin ndërsa zhvendosja dhe vështirësitë në qasjen ndaj kujdesit shëndetësor po rrisin rreziqet për fëmijët dhe familjet e prekura.
Zhvendosja e fundit vjen pas një përshkallëzimi ushtarak që filloi në korrik dhe u intensifikua në shtator, pas një periudhe qetësie relative pas armëpushimit të ndërmjetësuar nga OKB-ja në prill 2022.
Jemeni është në luftë që nga shtatori i vitit 2014, kur grupi Huthi mori kontrollin e kryeqytetit Sana dhe të disa provincave. Një koalicion arab i udhëhequr nga Arabia Saudite ndërhyri në mars 2015 në mbështetje të qeverisë së Jemenit.
