Gjermania kërkon marrëveshje të BE-së për përdorimin e aseteve të ngrira ruse për të mbështetur Ukrainën
Gjermania ka përsëritur thirrjen për shtetet anëtare të Bashkimit Evropian (BE) që të bien dakord për përdorimin e aseteve të ngrira ruse për të forcuar kapacitetet ushtarake të Ukrainës, transmeton Anadolu.
Duke folur për gazetarët në Bruksel, ministri i Punëve të Jashtme, Johann Wadephul, tha se Berlini po vazhdon përpjekjet diplomatike për të arritur një marrëveshje në samitin e këtij muaji të liderëve të BE-së për përdorimin e aseteve të palëvizshme ruse.
“Kjo duhet të bëhet mbi një bazë të sigurt ligjore. Komisioni Evropian po punon mbi këtë dhe do të prezantojë propozimet e tij. Ne e mbështesim këtë dhe marrim seriozisht shqetësimet e Belgjikës. Ato janë të justifikuara, por çështja mund të zgjidhet”, tha Wadephul.
“Ajo mund të zgjidhet nëse jemi të gatshëm të marrim përgjegjësi së bashku. Gjermania është e gatshme ta bëjë këtë dhe inkurajon të gjitha shtetet e tjera anëtare të BE-së të veprojnë po ashtu. Jam shumë i sigurt se propozimi i kancelarit do të mbizotërojë në fund”, shtoi ai.
Propozimi i kancelarit gjerman, Friedrich Merz, i prezantuar për herë të parë në shtator, parashikon dhënien e një kredie për Ukrainën prej 140 miliardë eurosh e mbështetur nga asetet e ngrira ruse. Sipas Berlinit, plani synon të forcojë kapacitetet ushtarake të Kievit dhe të sjellë Moskën në tryezën e bisedimeve.
Megjithatë, Belgjika, ku është organi financiar evropian që mban asetet e ngrira, ka ngritur kundërshtime të ndryshme. Qeveria belge ka frikë se mund të përballet me probleme ligjore dhe të mbajë vetëm përgjegjësinë financiare. Ajo ka insistuar që të gjitha shtetet anëtare të BE-së të ndajnë rreziqet financiare dhe ligjore të këtij propozimi.
Më herët, ministri belg i Punëve të Jashtme, Maxime Prevot, riafirmoi shqetësimet e vendit të tij mbi planin e BE-së.
“Kemi ndjesinë e frustruar se nuk po dëgjohemi, shqetësimet tona po minimizohen. Teksti që Komisioni Evropian do të paraqesë sot nuk adreson shqetësimet tona në mënyrë të kënaqshme”, tha Prevot për gazetarët.
