Mickoski nga Tirana: Qëndrojmë me vendosmëri të orientuar drejt integrimeve evropiane

Kryeministri Hristijan Mickoski po merr pjesë sot në Tiranë në Samitin e Liderëve me temë “Rruga jonë drejt BE-së”.
Në një postim në Facebook, ai theksoi se vendi mbetet i vendosur në orientimin e tij drejt integrimeve evropiane dhe bashkëpunimit rajonal.

“Sot po marr pjesë në Samitin e Liderëve ‘Rruga jonë drejt BE-së’, që po mbahet në Tiranë, Shqipëri. Vendi ynë mbetet me vendosmëri i orientuar drejt integrimeve evropiane dhe bashkëpunimit rajonal, si shtyllat kryesore të vizionit tonë të përbashkët për një Ballkan Perëndimor të begatë,” shkroi Mickoski.

Ai shtoi se ky tubim i rëndësishëm paraqet mundësi të shkëlqyer për thellimin e dialogut dhe forcimin e përpjekjeve të përbashkëta të vendeve të Ballkanit Perëndimor në procesin e afrimit drejt Bashkimit Evropian.

Është paraparë që kryeministri Mickoski të mbajë fjalim në panelin e diskutimit me temë: “Përmbushja e detyrimeve të përbashkëta, rezultatet dhe përshpejtimi”.

Në Samitin e Tiranës, përveç liderëve të vendeve të Ballkanit Perëndimor, merr pjesë edhe komisionerja evropiane për zgjerim, Marta Kos.