Ulen pritjet në Tabanoc, hapen 8 pika për pagesën e gjobave nga “Qyteti i Sigurt”
Këtë mëngjes janë ulur ngarkesat në trafik në pikën kufitare Tabanoc, në drejtim të Serbisë, pasi dje, në ditën e parë të zbatimit të sistemit “Qyteti i Sigurt” për drejtuesit e huaj, u krijuan kolona të gjata në dalje nga Maqedonia e Veriut.
Sipas pamjeve nga kamerat e pikës kufitare, trafiku këtë mëngjes po zhvillohet me ngarkesë dukshëm më të ulët.
Aktualisht në Tabanoc funksionojnë tetë pika për trajtimin e drejtuesve të huaj që kanë shkelje të regjistruara të trafikut. Sipas informacioneve të “Grçka Info”, e gjithë procedura për kontrollin dhe pagesën e gjobës zgjat deri në 15 minuta për drejtues.
Procedura është organizuar në mënyrë që nga qarkullimi normal të veçohen vetëm automjetet për të cilat sistemi tregon se kanë një shkelje të regjistruar. Automjetet e tjera vazhdojnë drejt daljes nga shteti.
Policia i veçon automjetet, merr dokumentet dhe i udhëzon drejtuesit të parkojnë dhe ta vazhdojnë procedurën në një pikë të posaçme.
Sipas përvojave të udhëtarëve, dokumentet skanohen, futen të dhënat e nevojshme dhe numri i telefonit, ndërsa drejtuesi lë edhe një adresë elektronike ku merr një lidhje me udhëzimet për pagesën.
Pagesa kryhet online me kartë bankare, ndërsa në pikën kufitare është në dispozicion edhe rrjeti Wi-Fi. Pas pagesës, konfirmimi i tregohet policisë, dokumentet i kthehen drejtuesit dhe ai mund të vazhdojë udhëtimin.
Ndërkohë, Ministria e Punëve të Brendshme ka aktivizuar edhe aplikacionin ueb me ndërfaqe mobile “Qyteti i Sigurt”, i cili në këtë fazë është i dedikuar për shtetasit e huaj, përkatësisht për pronarët dhe drejtuesit e automjeteve me targa të huaja.
Përmes aplikacionit, drejtuesit e huaj mund të kontrollojnë shkeljet e trafikut të regjistruara nga sistemi, të shohin urdhër-pagesat e lëshuara dhe t’i paguajnë gjobat në mënyrë elektronike.
Për të hyrë në sistem, drejtuesi duhet të fotografojë ose skanojë dokumentin e udhëtimit dhe të vendosë targën e automjetit ose automjeteve që përdor në Maqedoninë e Veriut.
Kontrolli përfshin edhe shkeljet e regjistruara më parë, duke filluar nga 1 shkurti 2026.
Kur gjatë daljes nga shteti sistemi konstaton se një automjet ka një shkelje të regjistruar, drejtuesit i lëshohet procesverbal dhe urdhër-pagesë për kundërvajtje. Nëse gjoba nuk paguhet sipas procedurës së parashikuar, çështja mund t’i përcillet gjykatës kompetente.
Dita e parë e zbatimit të mekanizmit për drejtuesit e huaj u shoqërua me ngarkesë të madhe në trafik dhe kolona në Tabanoc. Në fund të ditës u hapën pika shtesë, pas së cilës ngarkesa në trafik filloi të ulej.
