Izraeli vlerëson dëmin ekonomik nga greva e punëtorëve në aeroportin “Ben Gurion” deri në 10 milion dollarë
Ministria e Financave e Izraelit vlerëson dëmin ekonomik nga një grevë e punëtorëve në aeroportin “Ben Gurion” në 25 deri në 30 milionë shekelë (8,3 milionë dollarë – 10 milionë dollarë), njoftuan mediat izraelite të enjten, transmeton Anadolu.
Ynet, duke cituar një vlerësim paraprak nga ministria, tha se dëmi përfshin humbjen e kohës së pasagjerëve, kostot direkte dhe operacionale për linjat ajrore, humbjen e të ardhurave për Autoritetin e Aeroporteve të Izraelit dhe operatorët e aeroportit, ndërprerjen e ngarkesave dhe logjistikës, dëmtimin e zinxhirit të furnizimit dhe humbjet e turizmit dhe mikpritjes.
Operacionet në aeroportin “Ben Gurion” kishin rifilluar më herët pasi u ndaluan për rreth një orë kur një mosmarrëveshje pune detyroi të gjitha sportelet e kontrollit të mbylleshin.
“Sipas ministrisë, shkaku i dëmit rrjedh nga problemet e mëposhtme: kapaciteti i infrastrukturës së aviacionit të Izraelit është shumë i kufizuar, infrastruktura kombëtare e aviacionit varet vetëm nga një operator i vetëm dhe komiteti i punëtorëve parandalon efikasitetin, fleksibilitetin dhe zhvillimin e aeroportit,” raportoi Ynet.
Disa fluturime me destinacionin për në Tel Aviv u detyruan të ktheheshin prapa dhe të ktheheshin në vendet e tyre të origjinës pasi operacionet në aeroport u reduktuan për shkak të mbylljes së sporteleve të kontrollit.
Punonjësit e katër kompanive të shërbimeve tokësore që operojnë në aeroport gjithashtu thuhet se ndërprenë punën.
Ndërprerjet erdhën gjatë një prej periudhave më të ngarkuara të vitit, kur aeroporti trajton afërsisht 100.000 pasagjerë dhe rreth 600 fluturime në ditë.
