Ish-kandidati për president të Brazilit ikën me familjen në SHBA
Flavio Bolsonaro është larguar nga Brazili dhe ka udhëtuar drejt Shteteve të Bashkuara së bashku me bashkëshorten dhe dy vajzat e tij, pak ditë pas humbjes në zgjedhje.
Lajmi është konfirmuar për Reuters nga një burim pranë senatorit brazilian.
Largimi i tij ndodhi vetëm disa orë pasi policia braziliane njoftoi anulimin e pasaportave të tij.
Autoritetet thanë se Bolsonaro nuk kishte respektuar urdhrin për dorëzimin e tyre brenda 24 orëve. Masa ishte marrë në kuadër të një hetimi për dyshime për pastrim parash, akuza të cilat ai i ka mohuar.
Ky zhvillim rikthen në vëmendje rastin e babait të tij, ish-presidentit Jair Bolsonaro, i cili u largua drejt SHBA-së pasi nuk e pranoi humbjen ndaj Luiz Inacio Lula da Silvës në zgjedhjet e vitit 2022.
Ai u kthye më vonë në Brazil dhe u dënua me 27 vjet burgim për përfshirje në një komplot për grusht shteti.
Flavio Bolsonaro, ndërkohë, nuk e ka pranuar zyrtarisht rezultatin zgjedhor. Të dielën, ai paralajmëroi se do të kërkonte anulimin e tij, duke pretenduar se kishte pasur parregullsi gjatë votimit. Megjithatë, një ditë më vonë, Partia Liberale, së cilës ai i përket, deklaroi se e pranonte fitoren e Lulës.
Pas përfundimit të numërimit, Lula, 80 vjeç, mori 51,79 për qind të votave, ndërsa kundërshtari i tij 45-vjeçar siguroi 48,21 për qind.
Analistët vlerësuan se pjesëmarrja e lartë e qytetarëve në zgjedhje mund të ketë qenë një nga faktorët që ndikuan në rezultatin përfundimtar.
