Trump thotë se një marrëveshje për rihapjen e Ngushticës së Hormuzit mund të arrihet “së shpejti”
Presidenti i SHBA-së, Donald Trump, tha të enjten se është “i përfshirë” në negociatat për rihapjen e Ngushticës së Hormuzit dhe sinjalizoi se një marrëveshje mund të arrihet “së shpejti”, transmeton Anadolu.
I pyetur nga gazetarët në Shtëpinë e Bardhë nëse është arritur marrëveshje për rihapjen e rrugës ujore strategjike, Trump tha: “Nuk dua të them se është arritur”.
“Është disi e hapur tani. E dini, ne kemi diçka që quhet bllokadë, e udhëhequr nga Marina e SHBA-së, dhe ne e kontrollojmë atë”, tha ai.
“Ata gjithmonë mund të gjuajnë diçka. Ata gjithmonë kanë diçka, ose mund të vendosin një minë, dhe nëse ke minë atje, kjo në një farë mënyre i prish gjërat, sepse njerëzit nuk duan t’i çojnë anijet e tyre miliarda dollarëshe dhe të goditen aksidentalisht nga një minë”, tha ai.
“Jam i përfshirë në negociata. Mendoj se po ecim mirë. Mund të ndodhë së shpejti”, tha ai, duke iu referuar një marrëveshjeje të mundshme me Iranin.
Trump gjithashtu hodhi poshtë shqetësimet lidhur me rezervat ushtarake të SHBA-së, duke thënë se vendi ka “fjalë për fjalë sasi masive municionesh”.
“Ne kemi furnizime me municione në gjithë botën dhe nëse do të na duheshin ndonjëherë, do t’i merrnim. Jemi të furnizuar në gjithë botën, por jemi në një gjendje shumë, shumë të mirë”, tha ai.
