Të shtëna me armë zjarri në SHBA! Tre të vrarë dhe tre të plagosur
Në një ngjarje të rëndë që ndodhi të martën në mbrëmje, tre persona humbën jetën dhe tre të tjerë u plagosën pas të shtënave në një kompleks shtëpish në qarkun Spotsylvania, jashtë Fredericksburgut, Virxhinia. Autoritetet kanë njoftuar se agresori, ose agresorët, janë ende të panjohur dhe në arrati.
Rreth orës 17:30, emergjencat u njoftuan për të shtënat dhe një numër i madh oficerësh filluan kërkimin e të dyshuarve dhe sigurimin e skenës së krimit. Zëdhënësja e zyrës së sherifit të Spotsylvania, majorja Elizabeth Scott, bëri të ditur se të gjithë viktimat u gjetën jashtë dhe janë dërguar në spital, por nuk është dhënë asnjë informacion i detajuar mbi gjendjen e tyre shëndetësore.
Një hetim intensiv po zhvillohet dhe autoritetet kërkojnë ndihmën e dëshmitarëve për të dërguar video ose informacione që mund të ndihmojnë në zbardhjen e rastit. Nuk ka ende informacione lidhur me motivin e mundshëm të sulmit. Për të siguruar komunitetin, shkollat publike të Fredericksburgut njoftuan se do të fillojnë orët e mësimit dy orë më vonë të mërkurën, për shkak të ndikimit të thellë që ky incident ka pasur në komunitet.
