Sudani heq shtetrrethimin dhe gjendjen e jashtëzakonshme 2-vjeçare në Khartum
Sudani ka hequr shtetrrethimin 2-vjeçar dhe gjendjen e jashtëzakonshme të shpallur në Khartum, transmeton Anadolu.
Sipas mediave sudaneze, Komiteti Koordinues për Çështjet e Sigurisë i qeverisë hoqi gjendjen e jashtëzakonshme të vendosur për herë të parë në vitin 2024, duke bërë të ditur se banorët e Khartumit tani e tutje do të lejohen të lëvizin dhe të punojnë gjatë gjithë kohës.
Megjithatë, pas një takimi të kryesuar nga guvernatori i Khartumit, Ahmed Othman Hamza, komiteti sqaroi se pikat e kontrollit të sigurisë dhe patrullat e ushtrisë do të vazhdojnë të funksionojnë.
Ai gjithashtu u bëri thirrje banorëve që udhëtojnë gjatë orëve të vona të natës të mbajnë me vete dokumente identifikimi.
Komiteti gjithashtu ndaloi hyrjen e shtetasve të huaj në shtetin e Khartumit, me përjashtim të atyre që posedojnë viza ose leje të vlefshme hyrjeje, si me transport publik, ashtu edhe privat, përfshirë trenat dhe autobusët.
Ai paralajmëroi gjithashtu drejtuesit e automjeteve dhe kompanitë e transportit se shkelësit do të përballen me masa ndëshkuese.
Shtetrrethimi ishte vendosur për herë të parë në maj të vitit 2024 mes përkeqësimit të kushteve të sigurisë të lidhura me konfliktin ndërmjet ushtrisë sudaneze dhe Forcave paraushtarake të Mbështetjes së Shpejtë (RSF).
Shtetrrethimi kishte kufizuar lëvizjen e njerëzve dhe automjeteve nga ora 23:00 deri në 05:00, ndërsa kishte ndaluar të gjithë qarkullimin tregtar dhe lëvizjen e këmbësorëve nga ora 22:00 deri në 05:00.
Që nga prilli i vitit 2023, Sudani është përfshirë nga konflikti ndërmjet ushtrisë dhe RSF-së.
Lufta në vazhdim ka shkaktuar vdekjen e dhjetëra mijëra njerëzve dhe ka zhvendosur rreth 13 milionë të tjerë, sipas vlerësimeve të OKB-së dhe organizatave ndërkombëtare.
