SHBA-ja vendos sanksione të reja ndaj ushtrisë kubane dhe rrjeteve të transportit të energjisë
SHBA-ja të enjten vendosi sanksione të synuara ndaj tetë subjekteve, dy individëve dhe pesë cisternave të naftës të lidhura me Kubën, në kuadër të masave të fundit të një vale të vazhdueshme presioni ekonomik ndaj Havanës, transmeton Anadolu.
Departamenti Amerikan i Shtetit tha se sanksionet synojnë burimet e të ardhurave “të paligjshme” të ushtrisë kubane, rrjetet e furnizimit me energji, “elitat” qeveritare dhe kontraktorët kinezë të mbrojtjes që furnizojnë me pajisje forcat e armatosura të Havanës.
Njëkohësisht, Zyra për Kontrollin e Pasurive të Huaja (OFAC) e Departamentit të Thesarit zgjeroi kompetencat për vendosjen e sanksioneve dytësore ndaj çdo personi të huaj që operon në sektorët e prodhimit, teknologjisë, elektronikës dhe atij detar në Kubë.
Pas masave të fundit të Washingtonit, ministri i Jashtëm i Kubës, Bruno Rodriguez, shkroi në platformën sociale amerikane X: “Dënojmë faktin se gjatë dhjetë muajve të fundit, populli kuban ka vuajtur një forcim të paprecedentë të bllokadës ekonomike amerikane, vendosjen e një rrethimi energjetik të barasvlershëm me një bllokadë detare dhe zbatimin e sanksioneve dytësore”.
