Organizatat turko-amerikane i bëjnë thirrje Kongresit të SHBA-së të miratojë shitjen e avionëve F-35 për Turqinë

Shtatë organizata turko-amerikane i dërguan një letër anëtarëve të Kongresit të SHBA-së, duke u bërë thirrje ligjvënësve të mbështesin shitjen e avionëve luftarakë F-35 për Turqinë dhe heqjen e sanksioneve të vendosura ndaj vendit në kuadër të Aktit për Kundërvënien ndaj Kundërshtarëve të Amerikës Përmes Sanksioneve (CAATSA), transmeton Anadolu.

“Si një aleate e NATO-s prej gati 75 vitesh dhe një partnere e vijës së parë në fushën e sigurisë dhe diplomacisë, qasja e vazhdueshme e Republikës së Turqisë në sistemet amerikane të mbrojtjes u shërben interesave strategjike thelbësore të SHBA-së dhe ju kërkojmë me respekt të mbështesni shitjet në pritje të avionëve luftarakë F-35 të SHBA-së dhe të hiqni sanksionet dhe pengesat e panevojshme ndaj këtij bashkëpunimi”, thuhet në letër.

“Mbështetja e këtyre shitjeve është një investim në kohezionin e NATO-s, stabilitetin rajonal dhe një marrëdhënie dypalëshe me vlerë reale dhe në rritje. Ju bëjmë thirrje për mbështetjen tuaj dhe mirëpresim mundësinë për ta diskutuar më tej këtë çështje”, thuhet më tej.

Letra u nënshkrua nga Assembly of Turkish American Associations, Turkish American Coalition, Federation of Turkish American Associations, Turkish American National Steering Committee, MUSIAD USA, Turkish American Chamber of Commerce of the South dhe ASKON USA.

Organizatat vunë në dukje se marrëdhëniet SHBA-Turqi datojnë që nga viti 1831 dhe se Ankaraja është aleate formale e SHBA-së që nga anëtarësimi në NATO në vitin 1952, duke “siguruar kufirin juglindor të Aleancës dhe kontrolluar Bosforin dhe Dardanelet”.

Në letër iu referua bazave turke, përfshirë Incirlikun, si “të domosdoshme për mposhtjen e ISIS-it” (DAESH-it), ndërsa u theksua se forcat turke “luftuan dhe ranë përkrah trupave amerikane” gjatë Luftës së Koresë.

Organizatat argumentuan se miratimi i shitjes së avionëve F-35 “e mban Ankaranë të orientuar drejt furnizuesve amerikanë dhe atyre në përputhje me NATO-n, në vend të alternativave”, në një periudhë kur Evropa po rrit kapacitetet e saj të mbrojtjes dhe industria turke e mbrojtjes po zhvillohet.

Në letër iu referua gjithashtu rolit të Turqisë si një “aktor konstruktiv rajonal”, duke përmendur rolin e saj ndërmjetësues në luftën Rusi-Ukrainë, përpjekjet për paqe me PKK-në, përfshirjen në përpjekjet për stabilitet në Siri dhe afrimin me Armeninë.

Letra iu dorëzua më shumë se 50 anëtarëve të Kongresit në korrik.

SHBA-ja e përjashtoi Turqinë nga programi i avionëve luftarakë F-35 në vitin 2019, pasi kundërshtoi blerjen nga ana e saj të sistemit rus të mbrojtjes ajrore S-400, duke pretenduar se sistemi do të rrezikonte avionët luftarakë dhe se nuk ishte i përshtatshëm për t’u përdorur me sistemet e NATO-s. Turqia ka deklaruar vazhdimisht se nuk ka konflikt mes dy sistemeve dhe ka propozuar krijimin e një komisioni për ta shqyrtuar këtë çështje.

Disa institucione turke të mbrojtjes iu nënshtruan sanksioneve në kuadër të CAATSA-s.

Gjatë takimit me presidentin turk Recep Tayyip Erdogan në Turqi muajin e kaluar, në kuadër të samitit të NATO-s, presidenti amerikan Donald Trump tha se “patjetër” do ta shqyrtojë mundësinë që Ankaraja të blejë avionë luftarakë F-35 dhe se dëshiron të heqë sanksionet e CAATSA-s ndaj vendit.