Italia: Nuk ka mision ushtarak në Hormuz

Ministri italian i Mbrojtjes, Guido Crosetto, deklaroi të hënën se aktualisht nuk po zhvillohet asnjë mision në Ngushticën e Hormuzit, pavarësisht raportimeve për lëvizje detare në rajon.

Në një prononcim, Crosetto theksoi se afrimi i anijeve ushtarake në zonë nuk nënkupton domosdoshmërisht nisjen e një operacioni në Hormuz.

“Është një gjë t’i afrosh anijet më shumë me njëra-tjetrën dhe një tjetër t’i drejtosh ato drejtpërdrejt drejt Hormuzit”, u shpreh ai.

Sipas ministrit italian, çdo dislokim trupash që lidhet drejtpërdrejt me Ngushticën e Hormuzit do të kërkonte miratimin e një misioni të ri, duke përfshirë një armëpushim, kuadër ligjor dhe autorizim parlamentar.

Crosetto bëri të ditur se diskutimet për këtë çështje do të nisin në parlament të mërkurën, ndërsa shtoi se lëvizja e anijeve pranë rajonit mund të jetë pjesë e operacioneve ekzistuese dhe jo një mision i ri ushtarak.

Deklaratat vijnë në një kohë tensionesh të shtuara në Lindjen e Mesme dhe diskutimesh mes vendeve evropiane për sigurinë detare në dhe rreth Ngushticës së Hormuzit, pas përshkallëzimit të konfliktit mes SHBA-së, Izraelit dhe Iranit.