Grenlanda s’është në shitje, thotë kryeministrja e Danimarkës
Kryeministrja e Danimarkës, Mette Frederiksen, ka përsëritur të martën se Grenlanda “nuk është në shitje”.
Deklarata e saj vjen në ditën kur Donald Trump Jr., po viziton territorin danez, duke nxitur sugjerimet se SHBA-ja mund të marrë kontrollin e saj.
Ndonëse Frederiksen ka folur për një bashkëpunimin shumë të ngushtë të Danimarkës me SHBA-në, ajo ka këmbëngulur se “është vetëm Grenlanda ajo që mund të vendosë dhe të përcaktojë të ardhmen e Grenlandës”.
Djali i madh i presidentit të zgjedhur, Donald Trump po qëndron në Grenlandë për një vizitë private, gjë që ka rritur spekulimet se administrata e ardhshme e SHBA-së mund të kërkojë të marrë kontrollin e territorit danez të pasur me minerale, që është shtëpia e një baze të madhe ushtarake amerikane.
Qeveria e Grenlandës ka thënë të martën se vizita e Donald Trump Jr. do të bëhet “si një individ privat” dhe jo si një vizitë zyrtare. Përfaqësuesit e Grenlandës nuk do të takohen me të.
Presidenti i zgjedhur së fundmi ka rikthyer në qendër të vëmendjes interesin e tij për të përvetësuar territorin e gjerë Arktik që është pjesë e Danimarkës.
Ai ka thënë në një konferencë shtypi në Mar-a-Lago në Florida të martën se nuk do të përjashtonte përdorimin e forcës ushtarake ose detyrimit ekonomik për të marrë kontrollin e Grenlandës, duke thënë se “ne kemi nevojë për sigurinë kombëtare”.
Grenlanda është ishulli më i madh në botë dhe shtrihet në një rajon me rëndësi strategjike për SHBA-në, Rusinë, Kinën dhe të tjerët.
