Ekspertët e OKB-së thonë se Izraeli po kryen “fushatë të shënjestruar të urisë” në Gaza
Ekspertët e Kombeve të Bashkuara për të drejtat e njeriut kanë akuzuar Izraelin për kryerjen e një “fushate të synuar të urisë” që ka rezultuar në vdekjen e fëmijëve në Gaza.
“Fushata e qëllimshme dhe e synuar e urisë e Izraelit kundër popullit palestinez është një formë e dhunës gjenocidale dhe ka rezultuar në zi buke në të gjithë Gazën”, thanë në një deklaratë të martën 10 ekspertë të pavarur të OKB-së.
Misioni diplomatik i Izraelit në OKB në Gjenevë hodhi poshtë deklaratën dhe akuzoi ekspertët për “përhapje të dezinformatave” dhe “mbështetje të propagandës së Hamasit”.
Autoritetet shëndetësore të Gazës kanë thënë se të paktën 33 fëmijë kanë vdekur nga kequshqyerja, kryesisht në Gazën veriore, e cila deri vonë ishte përballur me peshën kryesore të fushatës ushtarake izraelite të nisur në tetor.
Në muajt e fundit, lufta është përhapur edhe në Gazën jugore, duke reduktuar flukset e ndihmave në enklavë mes kufizimeve nga Izraeli, i cili ka akuzuar agjencitë e OKB-së për dështimin për të shpërndarë furnizimet në mënyrë efikase.
“Me vdekjen e këtyre fëmijëve nga uria pavarësisht trajtimit mjekësor në Gazën qendrore, nuk ka dyshim se uria është përhapur nga Gaza veriore në Gazën qendrore dhe jugore”, thanë ekspertët.
Në një spital në Khan Younis, Ghaneyma Joma i tha agjencisë së lajmeve Reuters të hënën se kishte frikë se djali i saj do të vdiste nga uria.
