BE-ja synon angazhim me qeverinë e ardhshme izraelite bazuar në “parimet demokratike dhe vlerat e përbashkëta”
Bashkimi Evropian pret të angazhohet me qeverinë e ardhshme të Izraelit në bazë të “parimeve demokratike dhe vlerave të përbashkëta”, tha të mërkurën një zëdhënës i Komisionit Evropian, transmeton Anadolu.
“Ne presim të angazhohemi me qeverinë e ardhshme, duke u mbështetur në marrëdhëniet tona të kahershme dhe përkushtimin ndaj parimeve demokratike dhe vlerave të përbashkëta”, tha Anouar El Anouni gjatë një konference për media në Bruksel.
Ai tha se qasja e BE-së do të vazhdojë të bazohet në “dialog të sinqertë dhe të hapur”, me synimin për të avancuar bashkëpunimin dypalësh, për të trajtuar çështjet shqetësuese dhe për të punuar së bashku në promovimin e stabilitetit rajonal, sigurisë dhe një paqeje të drejtë e të qëndrueshme.
El Anouni përgëzoi popullin izraelit për zgjedhjet parlamentare, duke thënë se pjesëmarrja e lartë në votime pasqyron “demokracinë e gjallë” të Izraelit.
Sipas mediave izraelite, me 85,6 për qind të votave të numëruara në zgjedhjet parlamentare të së martës, blloku i kryeministrit Benjamin Netanyahu parashikohet të sigurojë 53 vende në Knesset, parlamentin prej 120 anëtarësh, tetë më pak se shumica e nevojshme për të formuar qeverinë.
Blloku opozitar i udhëhequr nga Gadi Eisenkot parashikohet të fitojë 48 vende, ndërsa partitë kryesisht arabe pritet të sigurojnë 19 vende, sipas faqes izraelite të lajmeve Ynet.
