Senati amerikan bllokon projektligjin për “butonin e fikjes” së IA-së mes debatit për rreziqet e superinteligjencës
Senati amerikan të mërkurën bllokoi përpjekjen e senatorit John Kennedy për të përshpejtuar një projektligj që do t’u kërkonte zhvilluesve të sistemeve të avancuara të inteligjencës artificiale të instalojnë “buton fikjeje” emergjence, në një kohë kur në Washington po rritet debati mbi rreziqet e mundshme që paraqet IA-ja gjithnjë e më autonome, transmeton Anadolu.
Kennedy, republikan nga Luiziana, kërkoi miratim unanim për avancimin e Aktit për Butonin e Emergjencës të IA-së, duke argumentuar se njerëzit duhet të ruajnë mundësinë për të fikur një sistem të IA-së nëse ai bëhet i pakontrollueshëm, raportoi The Hill.
“Kam një projektligj dhe në thelb ai thotë se nëse do të shesësh një model të avancuar të IA-së në Shtetet e Bashkuara të Amerikës, ai duhet të ketë një buton fikjeje”, tha Kennedy.
Ai tha se përgjegjësia për aktivizimin e butonit do t’u lihej kompanive që zhvillojnë sistemet, dhe jo qeverisë federale.
Kennedy paralajmëroi se përparime të tilla si vetëpërmirësimi i përsëritur mund të bëjnë që, në skenarin më të keq, një model i IA-së të veprojë përtej kontrollit efektiv njerëzor.
“Do të doja që të gjenim një mënyrë për të vendosur një ekuilibër mes inovacionit dhe sigurisë publike”, tha Kennedy.
Senatori Rand Paul, republikan nga Kentaki, kundërshtoi kërkesën, duke thënë se Kongresi duhet ta kuptojë më mirë teknologjinë para se të vendosë kërkesa të gjera.
Paul paralajmëroi se një detyrim i pakufizuar mund të prekë sistemet e IA-së të përdorura në gjithë ekonominë, përfshirë motorët e kërkimit dhe aplikacionet mjekësore.
“IA-ja do të jetë e pranishme në gjithë ekonominë dhe në shumë aspekte të saj. A do të duhet mjekët të vendosin një buton fikjeje në sistemet për analizën e recetave të barnave?”, tha Paul.
Paul propozoi krijimin e një komiteti dypartiak për të studiuar rreziqet që paraqet IA-ja superinteligjente dhe masat e mundshme mbrojtëse. Kennedy e hodhi poshtë propozimin, duke argumentuar se një tjetër studim i Kongresit mund ta vonojë më tej ndërmarrjen e masave.
