Ferati takon ambasadoren gjermane, në fokus reformat dhe zhvillimi institucional
Ministri për Marrëdhënie Ndërmjet Bashkësive, Agon Ferati, zhvilloi sot një takim me ambasadoren e Republikës Federale të Gjermanisë, Sh.S. Petra Drexler, ku u diskutua për thellimin e bashkëpunimit ndërmjet Ministrisë për Marrëdhënie Ndërmjet Bashkësive dhe Gjermanisë.
Sipas Feratit, në fokus të bisedës ishin zhvillimi institucional, forcimi i dialogut ndërmjet bashkësive, përfshirja e të rinjve dhe mbështetja e proceseve reformuese.
“Biseduam për bashkëpunimin ndërmjet Ministrisë për Marrëdhënie Ndërmjet Bashkësive dhe Republikës Federale të Gjermanisë, me fokus në zhvillimin institucional, forcimin e dialogut, përfshirjen e të rinjve dhe mbështetjen e proceseve reformuese”, deklaroi Ferati.
Ai theksoi se Gjermania vazhdon të jetë një partner i rëndësishëm i vendit në rrugën e reformave dhe zhvillimit institucional.
“Gjermania mbetet partner i rëndësishëm për reforma dhe zhvillim institucional”, u shpreh ministri.
Ferati vlerësoi gjithashtu mbështetjen e vazhdueshme të Gjermanisë për integrimin evropian dhe zhvillimin demokratik të vendit.
“E vlerësoj lart mbështetjen dhe përkushtimin e Republikës Federale të Gjermanisë për perspektivën evropiane, stabilitetin demokratik dhe zhvillimin e qëndrueshëm të vendit”, theksoi ai.
