Kasami: As VLEN-i e as Qeveria nuk kanë kërkuar tërheqjen e ambasadorit shqiptar
Kryetari i VLEN-it, Bilall Kasami, ka deklaruar se çështja e ambasadorëve është kompetencë ekskluzive e shteteve që i emërojnë dhe i vlerësojnë.
“Çështja e ambasadorëve është çështje e shteteve të cilët i emërojnë dhe eventualisht vendosin për t’i tërhequr. Atë që mund të garantoj është se VLEN dhe Qeveria e Maqedonisë së Veriut në asnjë moment nuk kanë pasur ndonjë kërkesë ndaj shtetit shqiptar për të tërhequr ambasadorin”, u shpreh Kasami.
Ai shtoi se pritshmëritë janë që përfaqësuesit diplomatikë të fokusohen më shumë në mbrojtjen e interesave të qytetarëve shqiptarë në vend.
“Ne do të kishim dashur që ai më shumë të përfaqësojë qytetarët dhe të mbrojë të drejtat e shqiptarëve në Maqedoninë e Veriut, më shumë sesa disa grupacione politike. Megjithatë, kjo është çështje që duhet ta vlerësojë shteti shqiptar dhe Ministria e Jashtme e Shqipërisë, të cilët e kanë emëruar dhe e vlerësojnë punën e tij”, theksoi ai.
