Të dy makinat e McLaren diskualifikohen nga Çmimi i Madh i Las Vegasit
Të dy makinat e skuadrës McLaren janë diskualifikuar nga Çmimi i Madh i Las Vegasit, pasi kontrolli pas garës ka zbuluar konsum të tepruar të plankut, duke e lënë krejtësisht të hapur garën për titullin e pilotëve me vetëm dy gara të mbetura. Lando Norris dhe Oscar Piastri, të cilët përfunduan në vendin e dytë dhe të katërt, u referuan te komisarët pas dyshimeve për shkelje teknike.
Pas më shumë se tre orësh shqyrtim, komisarët konfirmuan se të dy makinat kishin shkelur rregulloren teknike dhe i përjashtuan nga rezultati final i garës.
Në vendimin e tyre thuhej se matjet e kryera treguan se skajet e pasme të plankut ishin nën minimumin e lejuar prej 9 mm, duke arritur deri në 8.88 mm dhe 8.93 mm. Matjet u realizuan me mikrometër Mitutoyo me saktësi deri në 0.001 mm, në prani të përfaqësuesve të McLaren dhe zyrtarëve teknikë të FIA-s.
McLaren argumentoi se konsumimi ishte pasojë e “porpoising-ut të shtuar në këtë garë, mundësisë së kufizuar për testim për shkak të motit në Ditën 1, si dhe seancave të shkurtuara të praktikës”. Skuadra theksoi gjithashtu se shkelja nuk ishte e qëllimshme.
Megjithatë, komisarët theksuan se edhe në rast të dëmtimit të paqëllimshëm që mund të ketë shkaktuar lëvizje të dyshemesë, kjo nuk mjaftonte për të zbutur penalizimin.
“Pavarësisht pretendimeve të ekipit se mund të ketë pasur dëmtim aksidental që ka shkaktuar konsum shtesë, komisarët nuk e konsiderojnë këtë arsye të mjaftueshme për të ulur dënimin,” thuhej në vendim.
