Shtëpia e Bardhë ‘nuk ishte në dijeni’ se ambasadori amerikan në Izrael u takua me një spiun të dënuar

Shtëpia e Bardhë ka deklaruar se nuk ka qenë në dijeni për një takim që është zhvilluar më herët këtë vit midis ambasadorit të Shteteve të Bashkuara në Izrael, Mike Huckabee, dhe Jonathan Pollard, ish-oficer i Marinës amerikane, i dënuar për spiunazh në favor të Izraelit dhe i burgosur për dekada.

Duke folur para gazetarëve të enjten, zëdhënësja e Shtëpisë së Bardhë, Karoline Leavitt, tha se megjithëse administrata Trump nuk ka pasur njohuri paraprake për takimin, “presidenti qëndron pas ambasadorit tonë, Mike Huckabee, dhe gjithçkaje që ai po bën për Shtetet e Bashkuara dhe Izraelin.”

Sipas The New York Times, Huckabee është takuar me Pollard në korrik, në ambasadën amerikane në Jeruzalem.

Takimi, raporton gazeta, nuk figuronte në axhendën zyrtare të Huckabee-t dhe është zhvilluar pa dijeninë e agjencive amerikane të inteligjencës, sipas dy zyrtarëve amerikanë të paidentifikuar.

Pollard, ish-analist i inteligjencës në Marinën amerikane, u gjykua dhe u dënua në vitin 1987 për dorëzimin e mijëra materialeve tejet të klasifikuara të SHBA-ve te Izraeli në këmbim të parave dhe dhuratave. Ai u dënua me burgim të përjetshëm — dënimi më i rëndë i dhënë ndonjëherë për dikë që ka spiunuar për një aleat.

Pollard shërbeu 30 vjet burg përpara se të lirohej me kusht në vitin 2015 dhe u shpërngul në Izrael në vitin 2020. Në Izrael, ai shihet nga disa si hero.

Rasti pati tensionuar rëndë marrëdhëniet SHBA–Izrael asokohe dhe ende sot konsiderohet një nga shkeljet më serioze të informacionit të klasifikuar në historinë amerikane.

Në një intervistë të transmetuar nga rrjeti izraelit i24 News të enjten, Pollard tha se takimi me Huckabee është zhvilluar me kërkesën e tij.

“Fillimisht e kërkova intervistën për një arsye shumë personale,” tha ai.

“Doja të shpreh mirënjohjen time të sinqertë për të gjitha përpjekjet që ai [Huckabee] kishte bërë në emrin tim kur unë isha në burg,” shtoi ai.

Pollard tha se beson që dikush brenda CIA-s, i stacionuar në ambasadën amerikane në Izrael, ka rrjedhur informacione për takimin në media në një “përpjekje për të diskredituar” ambasadorin dhe “për ta larguar atë” nga detyra.

“Mendoj se njerëzit pas kësaj janë elemente anti-Izrael brenda administratës Trump,” deklaroi ai.

Mbetet ende e paqartë nëse Huckabee ka kërkuar miratim nga administrata Trump përpara se të takohej me Pollard. Por CIA është “alarmuar” nga lajmi i takimit, sipas burimeve për The Times, pasi ai përbënte shkelje të praktikave të kahershme që zyrtarët amerikanë të mos takohen me spiunë të dënuar.

Huckabee, mbështetës i flaktë i Izraelit dhe aleat politik i presidentit Donald Trump, kishte bërë më parë thirrje për lirimin e Pollard-it gjatë kandidimit të tij për nominimin republikan për president në vitin 2011.

Në intervistën e tij për i24 News, Pollard sulmoi anëtarë të administratës Trump, duke kritikuar të dërguarit special Jared Kushner dhe Steve Witkoff, të cilët kanë marrë role kryesore në bisedimet për paqe për t’i dhënë fund luftës së Izraelit në Gaza.

“I përçmoj Witkoff-in dhe Kushner-in; ata ishin të gatshëm të takoheshin me terroristë që na masakruan më 7 tetor [2023],” tha ai. /Al Jazeera/