Raporti i OKB-së dokumenton dhunën seksuale të ushtruar nga Izraeli ndaj të burgosurave palestineze
Raporti i Komisionit Hetimor të OKB-së, i cili konkludon se Izraeli po kryen gjenocid në Gaza, përfshin detaje tronditëse mbi keqtrajtimin e të burgosurve palestinezë, veçanërisht grave, raporton Al Jazeera, përcjell alfax.mk.
“Komisioni vëren se të burgosurat gra iu nënshtruan sulmeve seksuale dhe ngacmimeve në objekte ushtarake dhe në shërbimin e burgjeve të Izraelit, si dhe kërcënimeve për jetën e tyre dhe kërcënimeve për përdhunim,” thuhet në raport. “Ngacmimet seksuale përfshinin përpjekje për t’i puthur dhe prekur në gjoks.”
Komisioni shtoi se të mbijetuarat raportuan edhe kontrolle të zgjatura dhe invazive trupore.
“Gratë u rrahën dhe u ngacmuan, ndërkohë që iu drejtuan me sharje me përmbajtje seksuale. Të burgosurat gra u fotografuan pa pëlqimin e tyre dhe në rrethana poshtëruese, përfshirë në të brendshme përpara ushtarëve meshkuj, dhe këto fotografi shpesh u publikuan në rrjetet sociale,” theksohet në raport.
Ai shton gjithashtu se forcat izraelite i ngacmuan dhe turpëruan gratë palestineze publikisht.
“Për shembull, disa gra palestineze u detyruan të zhvesheshin deri në të brendshme dhe të hiqnin mbulesat e tyre në publik dhe para komunitetit,” thuhet aty. “Komisioni ka konstatuar se forcat e sigurisë izraelite i kanë poshtëruar dhe tallur qëllimisht gratë palestineze mbi bazën e gjinisë dhe etnisë së tyre.”
