Xhamia në Belgjikë vandalizohet me mbishkrim kundër Islamit për herë të dytë
Një xhami në Belgjikë u dëmtua me një mesazh antiislam për herë të dytë brenda dhjetë ditësh, raportoi të martën VRT, transmeton Anadolu.
Xhamia Tawfieq në qytetin Schelle u shënjestrua sërish me mbishkrim fyes i cili u shkrua me sprej përgjatë gjithë fasadës së saj, tha Muslim Rights Watch Belgjikë (MRWB).
“Ky është rasti i dytë në vetëm dhjetë ditë”, tha për transmetuesin kryetari i MRWB-së, Mohamed Amin Chaib.
Chaib tha se shënjestrimi i përsëritur i xhamisë tregon se vendet e adhurimit që u shërbejnë komuniteteve myslimane janë të cenueshme dhe bëri thirrje për vëmendje më të madhe ndaj sigurisë së tyre.
“Kjo nuk mund të hidhet më poshtë si vandalizëm i thjeshtë”, tha ai, duke ngritur pyetjen nëse autoritetet do të kishin reaguar me të njëjtën urgjencë nëse do të ishte shënjestruar një komunitet tjetër fetar.
Zona policore Rupel tha se ka nisur hetim për të përcaktuar nëse i njëjti person ka qenë përgjegjës për të dyja sulmet.
Xhamia u vandalizua më 5 shtator, kur në ndërtesë u shkrua me bojë i njëjti mesazh kundër Islamit dhe u vizatuan svastika.
Sipas raportimeve, pranë hyrjes u la gjithashtu jashtëqitje qeni.
Administrata e xhamisë paraqiti kallëzim kundër autorëve të panjohur pas incidentit të parë, ndërsa policia nisi hetimet.
Deri më tani nuk është identifikuar asnjë i dyshuar.
