Ushtria izraelite nis stërvitje ushtarake të befasishme në Bregun Perëndimor
Ushtria izraelite nisi sot stërvitje të befasishme ushtarake në Bregun Perëndimor të pushtuar, duke mobilizuar të gjitha batalionet e divizionit të saj që vepron në këtë territor, transmeton Anadolu.
Stërvitja zhvillohet në mes të sulmeve të vazhdueshme izraelite ndaj palestinezëve dhe në prag të sezonit të festave hebraike. Në një deklaratë, ushtria tha se stërvitja u zhvillua për të testuar gatishmërinë dhe përgatitjen operacionale të forcave të saj.
Ajo shtoi se të gjitha batalionet e Divizionit të Bregut Perëndimor ishin mobilizuar për t’iu përgjigjur “skenarëve të ndryshëm të befasishëm”. Ushtria pretendon se stërvitja ishte pjesë e përgatitjeve të saj për festat e ardhshme hebraike.
Periudha e festave nis sot me Rosh Hashanah, Vitin e Ri hebraik, e pasuar nga Yom Kippur më 20 shtator dhe Sukkot më 25 shtator. Izraeli rregullisht forcon masat ushtarake dhe kufizimet ndaj lëvizjes së palestinezëve në Bregun Perëndimor të pushtuar dhe Kudsin Lindor gjatë festave hebraike.
Sipas ushtrisë, stërvitja do të vazhdojë deri sot pasdite dhe do të përfshijë dislokimin dhe shtimin e lëvizjeve të forcave izraelite të sigurisë në të gjithë territorin.
Bregu Perëndimor ka përjetuar përshkallëzim të vazhdueshëm izraelit, përfshirë bastisje në qytetet, vendbanimet dhe kampet e refugjatëve palestinezë, si dhe arrestime, shembje dhe buldozime të tokave. Ndërkohë, bastisjet e forcave të sigurisë dhe dhuna e pushtuesve janë shtuar veçanërisht që nga lufta në Gaza.
Izraeli ka pushtuar Bregun Perëndimor, përfshirë Kudsin Lindor, që nga viti 1967 dhe ka ngritur atje vendbanime që konsiderohen të paligjshme sipas së drejtës ndërkombëtare.
