Turqia thotë se një anije me flamur francez po planifikon kërkime të paautorizuara në Mesdheun Lindor
Turqia deklaroi të premten se një anije me flamur francez po planifikon të kryejë kërkime shkencore detare pa autorizim në shelfin e saj kontinental në Mesdheun Lindor, duke theksuar se procesi i nevojshëm i miratimit ende nuk ka përfunduar, transmeton Anadolu.
Në një deklaratë me shkrim, Ministria e Jashtme e Turqisë tha se anija synon të kryejë kërkime shkencore detare “të paligjshme”, në lidhje me aktivitetet e vendosjes së kabllove brenda shelfit kontinental të Turqisë, kufijtë e jashtëm të të cilit i janë njoftuar OKB-së më 18 mars 2020.
Ministria tha se Turqia ka anuluar paralajmërimet e lundrimit të lëshuara pa autorizim nga Greqia dhe administrata grekoqipriote lidhur me aktivitetet e planifikuara.
Ajo theksoi se procesi për marrjen e miratimit të Turqisë, siç kërkohet nga parimet e vendosura të së drejtës ndërkombëtare detare, ende nuk ka përfunduar për pjesën e aktiviteteve të planifikuara brenda shelfit të saj kontinental.
“Turqia mbetet plotësisht e vendosur të mbrojë të drejtat e saj sovrane që burojnë nga e drejta ndërkombëtare”, thuhet në deklaratë, ku shtohet se Ankaraja do të vazhdojë të ndjekë një qasje të bazuar në bashkëpunim, dialog dhe koordinim në rajon.
