Izet Mexhiti merr pjesë në promovimin e librit për ngjarjet e Bit Pazarit të vitit 1992

Në prag të 6 nëntorit, datës që lidhet me ngjarjet e Bit Pazarit të vitit 1992, në Teatrin Shqiptar në Shkup është promovuar libri “E vërteta mbi ngjarjet e Bit Pazarit (1992)”, i historianit Qerim Lita.

Në këtë aktivitet mori pjesë edhe kryetari i Komunës së Çairit, Izet Mexhiti, i cili theksoi rëndësinë e dokumentimit të historisë përmes dëshmive dhe dokumenteve të kohës, në mënyrë që brezat e ardhshëm të kenë mundësi të njihen me ngjarjet që kanë lënë gjurmë në historinë e shqiptarëve të Shkupit.
Mexhiti vlerësoi punën e historianit Qerim Lita, duke theksuar se libri u mundëson edhe atyre që nuk i kanë përjetuar ngjarjet e vitit 1992 të njihen me atë që ndodhi në Bit Pazar dhe të kuptojnë rëndësinë historike të 6 nëntorit.

“Historia duhet të shkruhet që të mos harrohet. Brezat që vijnë pas nesh duhet të kenë mundësi ta njohin atë përmes dokumenteve dhe dëshmive të kohës”, ka shkruar Izet Mexhiti.