Studim: Popullsia indigjene e Australisë para kolonizimit mund të ketë qenë shumë më e madhe nga sa vlerësohej
Australia mund të ketë pasur një popullsi indigjene shumë më të madhe para kolonizimit evropian nga sa vlerësohej më parë, ndërsa një studim i ri e përcakton vlerësimin mesatar në 2.22 milionë banorë, transmeton Anadolu.
Studimi, i publikuar në revistën “Nature Human Behaviour”, përdori dëshmi arkeologjike dhe gjenetike, vëzhgime historike dhe modelim kompjuterik të kapacitetit mjedisor të kontinentit për të rindërtuar përmasat e popullsisë para kolonizimit britanik.
Vlerësimet e mëparshme përgjithësisht e kanë vendosur popullsinë indigjene të Australisë para kolonizimit në mes 250 mijë dhe 1 milion banorëve.
Studiuesit thanë se shifrat e mëparshme ishin ndikuar nga mungesa e regjistrimeve sistematike të popullsisë, si dhe nga sëmundjet dhe dhuna, të cilat tashmë i kishin zvogëluar komunitetet indigjene në kohën kur u bënë vlerësimet e para gjatë periudhës koloniale.
Studimi vlerësoi se rreth 93 për qind e popullsisë indigjene të periudhës para kolonizimit humbi në më pak se 80 vjet pas mbërritjes së Flotës së Parë në vitin 1788, ndërsa studiuesit ia atribuuan këtë kolaps demografik pasojave të kolonizimit, përfshirë sëmundjet dhe dhunën në zonat kufitare.
Studimi vlerësoi se rreth 2.06 milionë vdekje të tepërta midis viteve 1788 dhe 1861 do të nevojiteshin për të përputhur vlerësimin e tij të popullsisë me të dhënat historike të regjistrimeve të popullsisë.
