Spanja kërkon ndihmën e BE-së për krizën e emigrantëve në Ceuta
Spanja i ka kërkuar Bashkimit Evropian ndihmë për përpunimin dhe identifikimin e emigrantëve në enklavën e saj të Ceutës, në Afrikën e Veriut, pas valës së madhe të kalimeve kufitare nga Maroku.
Qeveria spanjolle i është drejtuar Frontex-it, Agjencisë Evropiane për Rojet Kufitare dhe Bregdetare, duke kërkuar ndihmë në menaxhimin e situatës, ndërsa ka kërkuar edhe 10 zyrtarë shtesë për procesin e identifikimit dhe përpunimit të emigrantëve.
Kërkesa vjen pothuajse një muaj pas kalimit masiv të kufirit, kur dhjetëra mijëra persona hynë në Ceuta nga Maroku. Sipas raportimeve, mijëra emigrantë vazhdojnë të ndodhen në territor, duke e vështirësuar menaxhimin e krizës për autoritetet spanjolle.
Ceuta është një nga dy territoret spanjolle në Afrikën e Veriut dhe përbën kufi tokësor mes Bashkimit Evropian dhe kontinentit afrikan.
