SHBA-ja refuzon kërkesën saudite për sulme ndaj Huthive, ofron mbështetje me inteligjencë
SHBA-ja ka refuzuar kërkesat e Arabisë Saudite për të ndërmarrë sulme të drejtpërdrejta ushtarake kundër Huthive në Jemen, pas marrjes së kontrollit prej tyre mbi qytetin strategjik bregdetar të Mokës, raportoi të enjten faqja e lajmeve Axios.
Sipas raportimit, Princi i Kurorës së Arabisë Saudite, Mohammed bin Salman, ka kontaktuar dy herë Presidentin amerikan Donald Trump, brenda një kohe të shkurtër, për të kërkuar operacione ajrore amerikane, ndërsa Huthit po përparonin drejt ngushticës së Bab al-Mandebit.
Fillimisht, princi i kurorës përshkroi tërheqjen e forcave aleate jemenase, përpara se disa orë më vonë të kërkonte zyrtarisht ndërhyrje të drejtpërdrejtë ushtarake amerikane.
Trump e refuzoi kërkesën, me synimin për të ruajtur fokusin e Uashingtonit te Irani dhe ngushtica e Hormuzit, si dhe për të shmangur hapjen e një tjetër teatri luftimesh, thanë për Axios burime në dijeni të çështjes.
Ndërsa përjashtoi mundësinë e sulmeve të drejtpërdrejta ajrore, Shtëpia e Bardhë ra dakord të ofrojë ndihmë jo-luftarake, duke autorizuar transferimin e informacioneve të inteligjencës dhe të dhënave për objektivat drejt forcave saudite.
Ndarja e informacioneve të inteligjencës vjen përveç rreth 200 personelit ushtarak amerikan të stacionuar në mbretëri, në role këshilluese dhe ndërlidhëse.
Uashingtoni dërgoi gjithashtu në Arabinë Saudite të enjten kreun e Komandës Qendrore të SHBA-së, admiralin Brad Cooper, për konsultime me zyrtarë të lartë sauditë të mbrojtjes.
Zhvillimet vijnë në një kohë tensionesh në rritje mes Riadit dhe Huthive. Duke folur të enjten në Këshillin e Sigurimit të OKB-së, ambasadori saudit Abdulaziz Alwasil tha se mbretëria do të merrte “të gjitha masat e nevojshme”, pas sulmeve të Huthive ndaj objekteve civile në qytetet e jugut të Arabisë Saudite në fillim të kësaj jave, ku mbetën të plagosur 73 persona.
Kontrolli i Mokës dhe i vijës bregdetare përreth saj ka rëndësi strategjike për shkak të afërsisë me ngushticën e Bab al-Mandebit, një rrugë jetike për transportin detar që lidh Detin e Kuq me Gjirin e Adenit.
Në Jemen ka rifilluar lufta mes forcave qeveritare dhe Huthive që nga fillimi i korrikut, pas disa vitesh qetësie relative nën një armëpushim që kishte nisur në prill të vitit 2022.
Huthit kanë kontrolluar kryeqytetin Sana dhe pjesë të mëdha të veriut dhe perëndimit të Jemenit që nga shtatori i vitit 2014, ndërsa qeveria e njohur ndërkombëtarisht dhe forcat aleate të saj kontrollojnë zona në jug dhe lindje.
Arabia Saudite ka udhëhequr një koalicion në mbështetje të qeverisë së Jemenit kundër Huthive, të rreshtuar me Iranin, që nga marsi i vitit 2015. /TRT World/
