Sali: SHBA mbetet aleat kyç në avancimin e reformave dhe forcimin e institucioneve demokratike
Zëvendëskryeministri i parë, Bekim Sali, ka zhvilluar një takim me të Ngarkuarën me Punë të Ambasadës së Shteteve të Bashkuara të Amerikës në Republikën e Maqedonisë së Veriut, Nicole Varnes, ku u rikonfirmua partneriteti i fortë strategjik ndërmjet dy vendeve.
Sali bëri të ditur se gjatë takimit u shkëmbyen mendime për bashkëpunimin në procesin e reformave, forcimin e institucioneve demokratike dhe avancimin e prioriteteve të përbashkëta.
“Sot pata kënaqësinë të zhvilloj një takim me të Ngarkuarën me Punë të Ambasadës së Shteteve të Bashkuara të Amerikës në Republikën e Maqedonisë së Veriut, Nicole Varnes. Gjatë takimit rikonfirmuam partneritetin e fortë strategjik ndërmjet dy vendeve tona dhe shkëmbyem mendime për bashkëpunimin në procesin e reformave, forcimin e institucioneve demokratike dhe avancimin e prioriteteve tona të përbashkëta”, deklaroi Sali.
Ai theksoi se Qeveria mbetet e përkushtuar për thellimin e mëtejshëm të bashkëpunimit me Shtetet e Bashkuara.
“Mbetemi të përkushtuar për thellimin e bashkëpunimit me Shtetet e Bashkuara, si aleat i rëndësishëm dhe partner i besueshëm i Republikës së Maqedonisë së Veriut”, theksoi zëvendëskryeministri i parë Bekim Sali.
