Qytetarët besojnë se mediat japin vetëm informacione sipërfaqësore, tregon anketa
Rreth 71% e qytetarëve besojnë se mediat ofrojnë vetëm informacione sipërfaqësore, ndërsa shumë të tjerë (39%) mendojnë se komunikimi nga institucionet publike shpesh bazohet në deklarata të përgjithshme dhe jo në argumente. Qytetarët kryesisht e përdorin informacionin për të qëndruar të informuar, për të marrë vendimet e duhura në jetën e tyre private dhe për të edukuar veten, e më pak për aktivizim social dhe vendimmarrje për çështje të rëndësishme shoqërore, raporton Alfax.
Këtë e ka treguar anketa e opinionit publik “Praktikat dhe perceptimet e qytetarëve për informimin dhe trajtimin e dezinformatave”, të cilën Instituti për Studime të Komunikimit (IKS) e ka realizuar gjatë muajve qershor dhe korrik.
Qytetarët janë më të interesuar për temat që lidhen me ekonominë, financat dhe biznesin (37%), shëndetin dhe mirëqenien (36%), pasuar nga politika e brendshme (35%) dhe kulturën dhe argëtimin (33%). Televizioni mbetet burimi kryesor i informacionit, veçanërisht tek të moshuarit, ndërsa të rinjtë më së shumti përdorin mediat sociale dhe portalet e internetit. Pavarësisht përdorimit të gjerë të këtyre burimeve të informacionit, një përqindje më e madhe (43%) besojnë se mediat ndonjëherë mbulojnë tema me interes për ta dhe vetëm 29% besojnë se ato ofrojnë analiza të thelluara dhe informacion gjithëpërfshirës. Të rinjtë tregojnë një tendencë më të madhe për të përdorur informacionin për të inkurajuar aktivizmin në krahasim me të moshuarit, raporton Alfax.
Sa i përket besimit në media, pothuajse gjysma e të anketuarve (49%) dyshojnë në të gjitha lajmet që lexojnë, dhe vetëm 15% i besojnë plotësisht. Të anketuarit më të rinj dhe ata të moshës 35 deri në 44 vjeç janë veçanërisht skeptikë. Edhe pse në përgjithësi ka dyshime për përmbajtjet e publikuara në media, një e treta e të anketuarve (31%) nuk kontrollojnë asnjëherë burimin e lajmit, dhe 40% nuk kontrollojnë asnjëherë nëse autori i tekstit është i nënshkruar. Shumica (53%) e të anketuarve janë përgjigjur se ndonjëherë kanë ndarë informacione të pasakta, dhe 44% besojnë se ndonjëherë mund të njohin dezinformata. Politika e brendshme është fusha ku pothuajse gjysma e të anketuarve (48%) kanë vërejtur informacione të pasakta.
Për sa i përket komunikimit me institucionet publike, shumica e të anketuarve marrin informacion përmes mediave sociale (46%), dhe një përqindje e konsiderueshme përdorin edhe faqet e internetit (42%). Megjithatë, pothuajse një e treta (29%) besojnë se vetëm një pjesë e vogël e informacionit që u nevojitet gjendet në faqet e institucioneve në rrjetet sociale, dhe shumica e të anketuarve (38%) janë pjesërisht të kënaqur me komunikimin me institucionet rreth temat e tyre me interes.
Sondazhi telefonik u krye nga data 15 qershor deri më 2 korrik 2024 në një kampion përfaqësues prej 1,142 qytetarësh mbi 18 vjeç nga të gjitha rajonet e vendit, nga Instituti për Demokraci Societas Civilis.Alfax.
