Presidenti zviceran Guy Parmelin do të japë dorëheqje në fund të vitit 2026
Presidenti zviceran Guy Parmelin njoftoi sot se do të largohet nga Këshilli Federal në fund të vitit 2026, duke i dhënë fund mandatit të tij 11-vjeçar në qeveri, transmeton Anadolu.
Parmelin tha se ai informoi kolegët e tij këshilltarë federalë gjatë takimit të tyre javor se do të largohet nga detyra më 31 dhjetor. “Deri atëherë, do të kenë kaluar 11 vjet që kur jam zgjedhur në këtë post dhe ka ardhur koha që unë t’i hap rrugën forcave të reja”, tha ai në një konferencë për media në Bernë.
Parmelin, 66 vjeç, tha se ai reflektoi gjatë pushimit të verës se çfarë do të ishte më e mira për Zvicrën dhe gradualisht arriti në përfundimin se largimi në fund të vitit 2026 ishte “vendimi më i përshtatshëm”.
Politikani i Partisë Popullore Zvicerane u zgjodh në Këshillin Federal në dhjetor 2015. Ai drejtoi Departamentin e Mbrojtjes nga janari 2016 përpara se të merrte përgjegjësinë e Departamentit Federal të Çështjeve Ekonomike, Arsimit dhe Kërkimit në 2019.
Ai ka shërbyer dy herë si president i rradhës i Zvicrës, në 2021 dhe 2026. Parmelin tha se Zvicra ishte e pozicionuar mirë për t’u përballur me sfidat aktuale globale, por paralajmëroi se “asgjë nuk është fituar kurrë përfundimisht” pasi bota ndryshon me shpejtësi.
“Me luftën në Lindjen e Mesme, ringjalljen e proteksionizmit, paqëndrueshmërinë gjeopolitike globale dhe ndikimin e tij në sigurinë e furnizimit tonë, ne e gjejmë veten përsëri në një periudhë të trazuar, të komplikuar nga sfidat e reja të paraqitura nga inteligjenca artificiale dhe pasojat e saj për shoqërinë dhe bizneset tona”, tha ai.
“Megjithatë, besoj se mund të them se Zvicra është e pozicionuar mirë për të përballuar këto sfida, me financa të shëndosha, borxhe të kontrolluara, një sistem arsimor me performancë të lartë dhe kompani inovative që mbi të gjitha, investojnë në të ardhmen”.
Parmelin paralajmëroi se dështimi për t’u përshtatur dhe për të marrë vendimet e nevojshme mes konkurrencës globale gjithnjë e më të ashpër mund ta lë Zvicrën të përballet me një “zgjim brutal”.
