Polakët gjejnë kokainë me vlerë 15 milionë euro në fund të Detit Baltik

Rojet kufitare polake zbuluan më shumë se 100 kilogramë kokainë në fund të Detit Baltik gjatë operacioneve për mbrojtjen e infrastrukturës, njoftuan autoritetet të martën.

Droga u gjet në shtratin e detit në zonën e Gjirit të Gdansk në Poloninë veriore. Më pas u identifikuan autorët, si dhe sasi më të mëdha droge.

Shtatë persona janë arrestuar për drogën e gjetur, vlera e së cilës mund të arrijë në 60 milionë zloty (14,45 milionë euro).

Shtetet baltike janë në gatishmëri për çdo incident që përfshin infrastrukturën kritike nënujore. NATO ka deklaruar se do të forcojë praninë e saj në rajon pas disa incidenteve në të cilat një mjet nënujor pësoi dëme të dyshimta.

Të arrestuarit rrezikojnë deri në 20 vjet burg nëse shpallen fajtorë.