Padi penale ndaj tre personave fizikë dhe një personi juridik në RMV, dëmtuan buxhetin e një Kombinati duhani për mbi 3.3 milionë denarë
SPB Manastir ka ngritur kallëzim penal ndaj L.B. (59) nga Prilepi, nën dyshimin për kryerjen e veprave penale “përvetësim në detyrë”, “keqpërdorim i pozitës dhe autorizimit zyrtar” dhe “falsifikim i dokumentit zyrtar”; ndaj K.S. (60) nga Prilepi, nën dyshimin për veprën penale “punë e pandërgjegjshme në detyrë”; ndaj J.D. (41) nga Prilepi, nën dyshimin për veprat penale “fshehje” dhe “falsifikim i dokumentit zyrtar”; si dhe ndaj një personi juridik nga fshati Malo Konjari i Prilepit, nën dyshimin për veprën penale “fshehje”, transmeton Portalb.mk.
I dyshuari i parë, L.B., gjatë viteve 2021/2022 ka punuar në SHA “Kombinati i Duhanit” – Prilep si koordinator i grupit për sigurim, ndërsa i dyshuari i dytë, K.S., në të njëjtën periudhë ka qenë drejtor i përgjithshëm ekzekutiv i SHA “Kombinati i Duhanit”. I dyshuari i tretë, J.D., është pronar dhe menaxher i personit juridik të kallëzuar, një kompani e autorizuar për blerjen dhe shitjen e materialeve të mbeturinave, me të cilën SHA “Kombinati i Duhanit” – Prilep kishte lidhur kontratë për blerjen e materialeve të mbeturinave.
Gjatë tremujorit të parë të vitit 2022, i dyshuari i parë, L.B., në kundërshtim me nenin 3 të Vendimit për miratimin e fshirjes nga evidenca kontabël dhe shitjen e mjeteve themelore, inventarit të imët dhe pjesëve rezervë si materiale të mbeturinave, me propozim verbal të drejtorit të atëhershëm të përgjithshëm ekzekutiv, K.S., ishte autorizuar që ai të kryente shitjen e mbeturinave në vend të referentit përgjegjës për menaxhimin e mbeturinave.
Gjatë shkurtit 2022, i dyshuari i parë, me ndihmën e të dyshuarit të tretë J.D., ka fshehur të paktën 185.000 kilogramë hekur të mbeturinave nga Njësia e Punës “Zavodi” – Mazhucisht dhe nuk e ka regjistruar atë në llogarinë e Kombinatit të Duhanit. Hekuri i mbeturinave i është dorëzuar dhe shitur personit juridik nga fshati Malo Konjari me një çmim dy denarë më të lartë për kilogram.
Megjithatë, në vend që pagesa të bëhej në llogarinë e SHA “Kombinati i Duhanit”, personi juridik nga Malo Konjari kishte përgatitur fletë fiktive blerjeje për hekurin e dorëzuar, mesatarisht rreth 25.000 kilogramë për person, në emër të tetë personave fizikë, të cilët ishin persona të afërt me të dyshuarin e parë, së bashku me deklarata për origjinën e mbeturinave.
Gjithashtu, paratë ishin transferuar në llogaritë bankare të shtatë personave fizikë, si dhe në llogarinë personale bankare të të dyshuarit të parë, L.B. Pas transferimit të mjeteve në llogaritë e tyre bankare, ata i tërhiqnin paratë në cash dhe ia dorëzonin të dyshuarit të parë.
Në këtë mënyrë, në këto llogari janë transferuar gjithsej 3.338.328 denarë, për të cilën shumë është dëmtuar SHA “Kombinati i Duhanit” – Prilep.
Ndërkohë, SHA “Kombinati i Duhanit” ka marrë nga personi juridik nga fshati Malo Konjari, në bazë të shitjes së hekurit të mbeturinave, një shumë totale prej 1.274.560 denarësh.
