Në mes të luftës tregtare, Trump e quan Kanadanë “një nga vendet më të këqija” për të negociuar

Presidenti i SHBA-së, Donald Trump, e ashpërsoi retorikën ndaj Kanadasë, duke e cilësuar fqinjin verior si një nga “vendet më të këqija në botë për të bërë marrëveshje”, transmeton Anadolu.

“Ata kanë përfituar nga Shtetet e Bashkuara për shumë dekada”, tha Trump në një intervistë me komentatorin politik Glenn Beck. Ai pretendoi se Otava vendos tarifa “të pabesueshme” dhe e trajton marrëdhënien sikur Kanadaja të ishte një shtet amerikan.

Trump vuri në dukje një deficit tregtar vjetor prej 60 miliardë dollarësh, duke deklaruar se ka ardhur koha t’i “mësojmë Kanadasë” se nuk mund ta “bëjë më këtë”.

Ai këmbënguli se SHBA-ja nuk varet nga burimet kanadeze, duke theksuar se, megjithëse humbja e qasjes në disa produkte mund të jetë “pak e papërshtatshme”, Washingtoni mund t’i sigurojë ato diku tjetër.

Ai tha se më herët kishte ofruar një “marrëveshje mjaft të mirë”, përpara dështimit të fundit të bisedimeve.

Sulmi verbal vjen pas përshkallëzimit të mëtejshëm të luftës tregtare dypalëshe. Më 22 gusht, SHBA-ja vendosi tarifa prej 50 për qind për produkte të ndryshme kanadeze, ndërsa një tarifë tjetër prej 50 për qind për sektorët e automjeteve dhe çelikut pritet të hyjë në fuqi më 1 janar.

Në përgjigje, Kanadaja njoftoi kundërtarifa prej 15-50 për qind për importe amerikane me vlerë 27,6 miliardë dollarë kanadezë (20 miliardë dollarë), duke filluar nga 8 shtatori.