MSF dënon Izraelin për mbylljen e hetimeve mbi vrasjen e stafit të saj në Gaza

Mjekët pa Kufij (MSF) dënoi të enjten vendimin e ushtrisë izraelite për të mbyllur çështjet lidhur me vrasjen e punonjësve të saj dhe familjarëve të tyre në Gaza, pa nisur hetime penale.

MSF tha se vendimi vjen pothuajse dy vjet pasi organizata kërkoi për herë të parë hetime mbi sulmet, si dhe pasi iu drejtua Gjykatës së Lartë të Izraelit për shkak të mosreagimit nga Prokurori i Përgjithshëm Ushtarak.

“Kjo nuk është drejtësi”, deklaroi organizata, duke argumentuar se një sistem ushtarak që heton vetveten ka dështuar të trajtojë shkelje që mund të përbëjnë krime lufte në Gaza.

MSF tha se emrat dhe vendndodhjet e stafit të saj u ishin komunikuar forcave izraelite dhe se automjetet e organizatës ishin qartësisht të identifikueshme.

“Ne kemi theksuar gjithmonë se të gjitha elementet tregojnë qartë përgjegjësinë e ushtrisë izraelite për sulmet vdekjeprurëse”, tha organizata.

Një prej rasteve lidhet me një sulm në nëntor 2023 ndaj një autokolone të MSF-së, ku u vranë dy familjarë të punonjësve të organizatës. Njëri prej viktimave, Alaa Al Shawa, ishte gjithashtu vullnetar që mbështeste ekipet mjekësore të MSF-së në spitalin Al-Shifa.

Rasti tjetër lidhet me një sulm ndaj një strehe të MSF-së në Khan Younis në shkurt 2024, ku u vranë bashkëshortja dhe nusja e një punonjësi të MSF-së, ndërsa gjashtë persona të tjerë u plagosën, pesë prej tyre gra ose fëmijë.

MSF tha se 15 punonjës të saj janë vrarë nga forcat izraelite në Gaza që nga tetori 2023, ndërsa gjatë së njëjtës periudhë janë vrarë rreth 1,700 punonjës të kujdesit shëndetësor.

Organizata tha se mbyllja e çështjeve tregon se “nuk ka asnjë perspektivë për llogaridhënie brenda sistemit ligjor izraelit” për vrasjen e stafit të saj.

MSF e lidhi gjithashtu vendimin me luftën dhe ofensivën e vazhdueshme izraelite ndaj palestinezëve në Gaza.

Sipas organizatës, asnjë hetim i brendshëm ushtarak nuk mund të zëvendësojë “një proces të vërtetë, të pavarur dhe të paanshëm të llogaridhënies”, duke kërkuar që rastet të shqyrtohen nga një organ hetimor i pavarur.

“Nuk ekziston asnjë objektiv ushtarak që justifikon sakrifikimin në masë të civilëve”, deklaroi MSF.

Sipas Ministrisë së Shëndetësisë në Gaza, gjatë 24 orëve të fundit janë vrarë 10 palestinezë dhe janë plagosur 25 të tjerë. Ministria thotë se numri i përgjithshëm i viktimave palestineze që nga tetori 2023 ka arritur në 73,417 të vrarë dhe 174,360 të plagosur.

Ministria tha gjithashtu se shkeljet izraelite të armëpushimit kanë shkaktuar 1,283 viktima dhe 4,248 të plagosur.