Mickoski për aplikacionin m.Uslugi: Nxjerrja e dokumenteve përmes telefonit, pa marrë ditë pushimi për të pritur në sportele
Kryeministri Hristijan Mickoski foli sot në një aktivitet me rastin e prezantimit të aplikacionit mobil m.Uslugi, duke e cilësuar atë si një hap të ri drejt digjitalizimit të administratës publike, me synimin që qytetarët të marrin shërbime më shpejt, më thjesht dhe pa pasur nevojë të shkojnë pa arsye nëpër sportele.
Në fjalimin e tij, Mickoski theksoi se përmes aplikacionit qytetarët do të kenë qasje në shërbimet publike dhe dokumentet personale përmes telefonit mobil, ndërsa institucionet do të duhet të shkëmbejnë të dhëna mes tyre, në vend që qytetarët të bartin dokumente nga një institucion në tjetrin.
“Para një viti, në Samitin Digjital të Ballkanit Perëndimor në Shkup, thashë se dua të vijë koha kur qytetari nuk do të ketë nevojë të marrë ditë pushimi nga puna për të nxjerrë një dokument, të presë para sportelit apo të bartë dokumente nga një institucion në tjetrin. Sot, me aplikacionin mobil m.Uslugi, po bëjmë një hap konkret pikërisht në këtë drejtim”, tha Mickoski.
Ai theksoi se digjitalizimi nuk nënkupton vetëm kalimin e procedurave administrative nga letra në ekran, por edhe thjeshtimin e procedurave, eliminimin e hapave të panevojshëm dhe ndërlidhjen e institucioneve.
Sipas kryeministrit, projekti ka edhe rëndësi ekonomike, pasi çdo vizitë e panevojshme në një institucion, dorëzim i përsëritur i dokumenteve dhe zvarritje e procedurave paraqet kosto shtesë për qytetarët, kompanitë dhe shtetin.
Mickoski theksoi se m.Uslugi nuk duhet të jetë projekt vetëm i një ministrie, por i të gjithë Qeverisë dhe administratës publike. Nga ministrat, drejtorët dhe institucionet ai pret të përcaktojnë se cilat shërbime mund të ofrohen përmes platformës dhe për cilat dokumente qytetarët nuk do të duhet të pyeten më.
“Prandaj, në fazën e ardhshme pres një zgjerim të konsiderueshëm të numrit të shërbimeve dhe dokumenteve që do të jenë të disponueshme përmes m.Uslugi. Nuk ka nevojë që sot të themi se sistemi ka përfunduar”, theksoi kryeministri.
Ai bëri të ditur se aplikacioni aktualisht është në versionin e parë dhe se funksionalitete të tjera do të shtohen gjatë periudhës së ardhshme.
Sa i përket integrimit evropian, Mickoski tha se një pjesë e konsiderueshme e detyrimeve për transformimin digjital, në kuadër të Agjendës së Reformave dhe Planit të Rritjes së Bashkimit Evropian, tashmë janë përmbushur përmes ndryshimeve ligjore, zhvillimit të infrastrukturës dhe ndërlidhjes së institucioneve.
Ai theksoi gjithashtu se duhet të merren parasysh edhe qytetarët që nuk kanë aftësi të mjaftueshme digjitale. Për këtë arsye, do të vazhdojë të jetë e nevojshme ekzistenca e qendrave të shërbimeve dhe mënyrave të tjera për të pasur qasje në administratë.
“Nuk do ta masim suksesin vetëm në bazë të numrit të njerëzve që e kanë shkarkuar aplikacionin. Më e rëndësishme është se sa shërbime do të përfundojnë realisht përmes tij. Sa kohë do të kursejnë qytetarët. Sa procedura do të bëhen më të thjeshta”, deklaroi Mickoski.
Ai e përgëzoi ministrin e Transformimit Digjital, Stefan Andonovski, dhe ekipin e ministrisë, duke theksuar se synimi është që gjatë periudhës së ardhshme të përfshihen sa më shumë institucione dhe të zgjerohet numri i shërbimeve elektronike në dispozicion të qytetarëve.
