Kaluan ndryshimet: Kazinot jo më afër se 500 metra nga shkollat
Kuvendi sonte me 59 vota “pro” dhe 9 “kundër” miratoi ndryshimet në Ligjin për Lojërat e Fatit, me të cilat kazinot dhe objektet e lojërave të fatit nuk do të mund të vendosen më afër se 500 metra nga shkollat.
Me rregullat e reja ndalohet reklamimi në vitrinat e kazinove, si dhe reklamat që paraqesin lojërat e fatit si mënyrë për të arritur sukses personal ose për të fituar para shpejt.
Ndryshimet ligjore parashikojnë që çdo aparat i lojërave të fatit të pajiset detyrimisht me sistem lokalizimi (GPS), me qëllim që të mundësohet kontroll i vazhdueshëm nga Drejtoria e të Ardhurave Publike. Gjithashtu, licencat nuk do të mund të shumëzohen, ndërsa vendosen edhe detyrime të reja financiare për hapjen e pikave të pagesës dhe pagesës së fitimeve.
Projektligji parasheh edhe rritjen e shumës së garancive bankare, si dhe zbatimin e rekomandimeve të MONEYVAL-it të Këshillit të Evropës, në përputhje me standardet për parandalimin e pastrimit të parave dhe financimit të terrorizmit.
Sipas qeverisë, këto ndryshime duhet të sigurojnë kontroll më të madh mbi sektorin, uljen e rreziqeve për keqpërdorime dhe mbrojtje më të madhe të të rinjve nga ndikimi i lojërave të fatit.
