Fshehën tatim prej 5.5 milionë denarësh – kallëzim penal për dy persona nga Struga

Drejtoria për Policinë Financiare ka paraqitur kallëzim penal kundër dy personave fizikë dhe një personi juridik nga fshati Labunishtë, Strugë, për shkak të evazionit fiskal. Personat kanë shmangur pagesën e tatimit në vlerë prej mbi pesë milionë denarësh përmes përdorimit të faturave të rreme.

I kallëzuari i parë, Sh. U., në cilësinë e pronarit dhe menaxherit të subjektit juridik Shoqëri për prodhim, tregti dhe shërbime INTERLA import-eksport D.O.O.E.L., Labunishtë – Strugë, gjatë periudhës nga 7 tetor 2010 deri më 10 shkurt 2023, me qëllim përfitimi të kundërligjshëm për vete dhe për subjektin e kallëzuar, gjatë vitit 2021 ka përdorur fatura hyrëse me përmbajtje të rreme për gjoja blerje mallrash dhe shërbimesh në vlerë totale prej **36.926.920 denarësh**, me TVSH të përfshirë në shumën prej 5.632.920 denarësh. Faturat janë lëshuar dhe vënë në dispozicion nga i kallëzuari i dytë A. T., në cilësinë e menaxherit të subjektit juridik Shoqëri për prodhim, tregti dhe shërbime RELAKS SAS D.O.O.E.L., Negotinë, në periudhën nga 29 prill 2020 deri më sot.

I kallëzuari Sh. U. ka evidentuar këto fatura hyrëse në evidencën kontabël dhe ka krijuar kërkesë për rimbursim të TVSH-së, të cilën e ka përdorur për kompensim apo ulje të obligimeve tatimore, duke i shkaktuar kështu dëm Buxhetit të Republikës së Maqedonisë së Veriut në bazë të TVSH-së në vlerë prej 5.632.920 denarësh, sipas normës llogaritëse prej 15,2542%.