Filipçe: VMRO-DPMNE e Mickoskit është kopje e zbehtë e Gruevskit
Kryetari i LSDM-së, Venko Filipçe, në një intervistë për Press 24, ka kritikuar ashpër kryesinë aktuale të VMRO-DPMNE-së, duke e cilësuar si “kopje të zbehtë” të partisë nga koha e Nikolla Gruevskit. Sipas Filipçes, dallimi kryesor ndërmjet lidershipit aktual dhe atij të kaluar të partisë është vetëm në emrin e kryetarit, ndërsa gjithçka tjetër është e pandryshuar.
“Po bëhet më e qartë se në VMRO-DPMNE ndryshimi i vetëm është që tani kryetar nuk është Gruevski por Mickoski. Gjithçka tjetër është pasqyruar si nën indigo. Kemi marrë një kopje të zbehtë të VMRO-DPMNE-së të dhjetë viteve më parë, me kuadro shumë më pak të aftë”, tha Filipçe, duke aluduar në pamundësinë e kuadrove të reja në parti për të ofruar diçka të re dhe të ndryshme.
Ai paralajmëron se ky model i qeverisjes, do t’i shtypë interesat e qytetarëve në favor të disa njerëzve në krye të VMRO-DPMNE-së.
“Kjo është një qeveri që do të krijojë politika vetëm për veten dhe qytetarët e kualifikuar për VMRO-DPMNE-në dhe të gjitha të tjerat do të jenë të parëndësishme. Një qeveri që do t’i mbajë qytetarët në frikë të vazhdueshme, me propagandë të përditshme të përçarjeve, armiqve dhe destabilizimit. Skenar i parë tashmë”, thotë Filipçe, duke theksuar se këto politika janë rikthim nga e kaluara.
Sipas tij, VMRO-DPMNE nuk do të punojë për përmirësimin e standardit të qytetarëve, por vetëm për interesat e individëve dhe grupeve të caktuara që do të kenë detyrë të vetme sigurimin e votave në zgjedhje.
“Kjo do të jetë një qeveri që nuk do të përmirësojë standardin e qytetarëve por të individëve dhe grupeve. Ata individë dhe grupe do të kenë për detyrë të sigurojnë vota në zgjedhje dhe kjo është e gjitha që VMRO-DPMNE-së i intereson”, shtoi ai.
Kreu i LSDM-së shprehu keqardhje për mungesën e ndonjë ndryshimi pozitiv në VMRO-DPMNE.
“Më vjen shumë keq që nuk ka ndryshim në VMRO-DPMNE, më vjen keq që nuk shohim një qeveri të re moderne, me gabime të mësuara nga e kaluara”, ka përfunduar ai duke kërkuar nevojën për modernizim dhe ndryshim të skenës politike.
