Çfarë është “Projekti Ester”? Plani për të goditur lëvizjen pro-palestineze në SHBA

Kur Fondacioni Heritage, një institut i njohur konservator në Shtetet e Bashkuara, publikoi vitin e kaluar një manual për të shkatërruar lëvizjen e solidaritetit me Palestinën, dokumenti kaloi thuajse pa vëmendje.

Por më shumë se tetë muaj më vonë, ky dokument – i njohur si “Projekti Ester” – po përballet me rritje të vëmendjes nga aktivistët dhe mediat, pjesërisht sepse presidenti Donald Trump duket se po ndjek me përpikëri udhëzimet e tij.

Autorët e Projektit Ester e paraqesin dokumentin si një përpjekje për të luftuar antisemitizmin, por kritikët thonë se synimi i tij i vërtetë është të “helmojë” grupet kritike ndaj Izraelit duke i paraqitur si aleatë të Hamasit.

Ky projekt u krijua si përgjigje ndaj protestave në rritje kundër mbështetjes së SHBA-së për luftën e Izraelit në Gaza – një fushatë që ekspertët e OKB-së dhe organizatat për të drejtat e njeriut e kanë përshkruar si gjenocid.

Çfarë është Fondacioni Heritage?

Fondacioni Heritage është një institut i fuqishëm konservator në Uashington, DC, që pretendon se formulon politika mbi “ndërmarrjen e lirë, qeverisjen e kufizuar, liritë individuale, vlerat tradicionale amerikane dhe një mbrojtje të fortë kombëtare”.

Megjithatë, kritikët argumentojnë se Projekti Ester në fakt bën thirrje për ndërhyrje shtetërore dhe shkelje të lirive themelore si ajo e fjalës dhe e organizimit, për të goditur opozitën ndaj politikave izraelite.

Sipas The New York Times, projekti është mbikëqyrur nga Victoria Coates, nënkryetare e Fondacionit dhe ish-këshilltare e sigurisë kombëtare gjatë mandatit të parë të Trump.

Fondacioni është gjithashtu autor i Projektit 2025 – një manual tjetër, i përshkruar nga kritikët si një plan autoritar për presidencën e dytë të Trump.

Cili është qëllimi i Projektit Ester?

Iniciativa deklaron se synon të “çmontojë infrastrukturën që mbështet” atë që e quan “Rrjeti Mbështetës i Hamasit” brenda 24 muajve.

Çfarë është ‘Rrjeti Mbështetës i Hamasit’ sipas Projektit Ester?

Sipas autorëve, ky rrjet përbëhet nga organizata dhe individë që mbështesin të drejtat palestineze dhe që “në mënyrë të drejtpërdrejtë apo të tërthortë” promovojnë kauzën e Hamasit, në dëm të interesave amerikane dhe sigurisë kombëtare.

Në thelb, dokumenti pretendon se “lëvizja pro-palestineze” është “efektivisht një rrjet terrorist”.

A ekziston ky rrjet?

Jo.

Në SHBA, ligjet kundër ndihmës materiale për organizata të shpallura “terroriste”, përfshirë Hamasin, janë jashtëzakonisht të ashpra. Nuk ka dëshmi që vërtetojnë ekzistencën e një “rrjeti mbështetës të Hamasit” në SHBA.

Beth Miller nga Jewish Voice for Peace (një organizatë që përmendet në dokument si pjesë e rrjetit), e cilëson pretendimin si “absurd” dhe tërësisht të pavërtetë.

Si synon Projekti Ester ta godasë lëvizjen për të drejtat palestineze?

Dokumenti parashikon një fushatë të shumëanshme politike, ligjore dhe financiare për të goditur mbështetësit e Palestinës.

Ai përmban 19 objektiva të quajtura “efekte të dëshiruara”, që përfshijnë:

• Refuzimin e hyrjes në universitete për të huajt pro-palestinezë,

• Censurimin e përmbajtjeve “antisemite” në rrjetet sociale,

• Shpërndarjen e “provave penale” për aktivistët te organet ekzekutive,

• Refuzimin e lejeve për protesta pro-Palestinë.

Gjithashtu, sugjeron që përkrahësit e Izraelit të angazhohen në “hulumtime ligjore private” për të gjetur shkelje penale dhe për të njollosur reputacionin e organizatave pro-palestineze.

“Duhet të përdorim ligjin si armë (‘lawfare’)”, thuhet në dokument.

A po e zbaton administrata Trump këtë plan?

Duket se po.

Victoria Coates tha për New York Times se faza aktuale përfshin “ekzekutimin e sanksioneve ligjore dhe financiare ndaj asaj që e konsiderojmë si mbështetje materiale për terrorizmin”.

Administrata ka filluar të anulojë vizat e studentëve të huaj kritikë ndaj Izraelit – një propozim i përfshirë në Projektin Ester.

Gjithashtu, dokumenti citon gjerësisht uebsajtin Canary Mission, i cili publikon emrat dhe të dhënat e studentëve pro-Palestinë, dhe besohet se administrata Trump e përdor këtë si bazë për dëbime.

Universitetet si Columbia janë vënë nën presion për të “rishikuar” programet për Lindjen e Mesme, pasi konsiderohen të njëanshme në favor të Palestinës.

Cilat grupe përmenden si objektiva?

Projekti Ester përmend drejtpërdrejt organizata arabe, myslimane dhe hebreje progresiste, si dhe grupe studentore. Në qendër të akuzave është American Muslims for Palestine (AMP).

Drejtori ekzekutiv i AMP, Osama Abuirshaid, tha se grupi është targetuar për shkak të emrit të tij dhe për shkak të efikasitetit të veprimtarisë së tij.

“Nëse ata mund të rrëzojnë AMP, mendojnë se do t’i trembin edhe të tjerët dhe do ta shuajnë të gjithë lëvizjen,” tha ai.

Pse fokusi te universitetet?

Sipas Tariq Kenney-Shawa nga Al-Shabaka, Projekti Ester përqendrohet te universitetet sepse mbështetja për Izraelin po bie ndjeshëm mes të rinjve në SHBA.

Një sondazh i Pew Research Center zbuloi se 53% e amerikanëve kanë opinion negativ për Izraelin, dhe kjo shifër rritet në 71% mes demokratëve nën moshën 50 vjeç.

A po funksionon Projekti Ester?

Aktivistët thonë se, ndonëse kjo fushatë po rrezikon sigurinë dhe mirëqenien e tyre, veçanërisht për studentët e huaj, ajo ka shkaktuar gjithashtu një kundër-reagim të fuqishëm.

“Sulmimet ekstreme kanë bërë që shumë njerëz të flasin edhe më me guxim,” tha Beth Miller nga JVP.

Po ashtu, shumë persona që më parë nuk ishin të angazhuar janë vetëdijësuar për hipokrizinë e censurës ndaj aktivistëve për të drejtat e palestinezëve.

Në maj, disa ligjvënës republikanë madje kundërshtuan një projektligj që shtrëngonte ndalimet për bojkotin e Izraelit, duke ngritur shqetësime për lirinë e shprehjes.

Abuirshaid e përmbyll: “Po, është lodhëse. Po na shpërqendron. Por më shumë se gjithçka tjetër, po na fuqizon për të vazhduar këtë betejë.”

Ali Harb – Al Jazeera