Araghchi thotë se marrëveshja SHBA-Iran do të nënshkruhet “në distancë”, paralajmëron për sabotim nga Izraeli

Ministri i Jashtëm i Iranit, Abbas Araghchi, ka deklaruar se, sapo të finalizohet, draft-marrëveshja mes Iranit dhe Shteteve të Bashkuara do të nënshkruhet “në distancë”, gjë që sipas tij mund të ndodhë “në ditët e ardhshme”.

“Sapo të përfundojnë fazat e fundit të negociatave tona, kjo marrëveshje do të nënshkruhet dhe do të shpallet. Nënshkrimi fillimisht do të bëhet në mënyrë digjitale. Secila palë do të nënshkruajë nga distanca. Pas kësaj do të njoftohet se memorandumi i mirëkuptimit është nënshkruar nga të dyja palët”, tha Araghchi në një intervistë për televizionin shtetëror iranian të premten vonë.

“Kjo mund të ndodhë në ditët e ardhshme. Jam shumë optimist”, shtoi ai.

Më herët, Araghchi kishte deklaruar se korniza e njohur si “Memorandumi i Mirëkuptimit i Islamabadit”, që synon t’i japë fund luftës mes Iranit dhe SHBA-së, e cila shpërtheu më 28 shkurt, “nuk ka qenë kurrë më afër realizimit”.

Të enjten, presidenti amerikan, Donald Trump, deklaroi se kishte anuluar sulmet e planifikuara kundër Iranit dhe pretendoi se një marrëveshje për përfundimin e luftës mund të nënshkruhet së shpejti.

Në intervistën e tij, Araghchi tha se do të publikojë detajet e marrëveshjes vetëm pasi ajo të jetë “përfunduar dhe finalizuar”, duke shtuar se zbulimi i tyre tani mund të “rrezikojë nënshkrimin e saj”.

Hormuzi si instrument parandalues

Araghchi tha se draft-marrëveshja përfshin përfundimin e bllokadës detare amerikane ndaj porteve iraniane, e cila sipas tij është në fuqi që nga 13 prilli, si dhe marrëveshje për menaxhimin e Ngushticës strategjike të Hormuzit.

Trafiku përmes Hormuzit, një nga rrugët më të rëndësishme detare për tregtinë globale, sipas tij është vënë nën kontrollin iranian që nga shpërthimi i luftës me SHBA-në dhe Izraelin më 28 shkurt.

Irani, i cili ka lejuar kalimin e vetëm një numri të kufizuar anijesh përmes ngushticës, ka insistuar që çdo mjet lundrues të marrë autorizim nga forcat e armatosura iraniane para transitit.

“Bllokada detare duhet të hiqet plotësisht. Kjo është pika e parë e përmendur në marrëveshje”, tha Araghchi.

“Irani ka marrë një vendim të prerë se administrimi i Ngushticës së Hormuzit nuk do të jetë më si më parë”, shtoi ai, duke theksuar se diskutimet për këtë çështje po vazhdojnë me Oman.

Ai e cilësoi Hormuzin si një nga “instrumentet kryesore të parandalimit” të Iranit.

Ministri iranian konfirmoi gjithashtu se detajet e programit bërthamor iranian, përfshirë rezervat e uraniumit të pasuruar në nivele të larta – një nga çështjet më të debatueshme për Uashingtonin – do të diskutohen gjatë një periudhe 60-ditore pas nënshkrimit të memorandumit.

“Qëndrimi ynë ka qenë gjithmonë se mënyra e vetme për të trajtuar rezervat e materialit të pasuruar është hollimi i tij brenda Iranit”, deklaroi ai.

Paralajmërim për sabotim izraelit

Gjatë intervistës, Araghchi paralajmëroi për përpjekje të mundshme për të sabotuar marrëveshjen, duke drejtuar gishtin nga Izraeli.

“Duhet ta them hapur se kjo marrëveshje ka armiq, dhe në krye të tyre është regjimi sionist (Izraeli), i cili po kërkon pretekste për ta penguar dhe rrënuar atë”, tha ai.

Sipas Araghchit, çdo përparim drejt një marrëveshjeje për përfundimin e konfliktit mund të përballet me tentativa për ta minuar procesin përpara se ai të përmbyllet zyrtarisht.