MPB me masa të rrepta: Marrje e përhershme e automjetit për shoferët e dehur, nën ndikimin e drogës dhe të rrezikshëm
Pjesëmarrësit më të papërgjegjshëm në trafik së shpejti do të përballen me njërën nga masat më të ashpra deri më tani – heqjen e përhershme të automjetit. Ndryshimet e reja në Ligjin për sigurinë në komunikacion, Ligjin për kundërvajtje dhe në Kodin Penal parashohin konfiskimin e automjeteve për personat që ngasin veturën pa patentë shoferi, nën ndikimin e alkoolit apo të drogës, si dhe për ata që ngasin me tejkalim ekstrem të shpejtësisë.
Kjo është hera e parë në vend që të futet konfiskimi i përhershëm i automjetit si masë ndëshkuese.
Sipas paralajmërimeve, nuk do të ketë rritje të gjobave, por do të ketë sanksione më të rrepta. Përveç konfiskimit të veturës, ndryshimet në Kodin Penal parashikojnë që çdo drejtim i pakujdesshëm i një automjeti motorik të ndëshkohet me burg të detyrueshëm ose me dënim me kusht, përveç gjobës me para.
Automjetet e konfiskuara do t’u dhurohen institucioneve publike dhe do të vihen në shërbim të qytetarëve.
Qëllimi i masave të reja është forcimi i parandalimit dhe rritja e vetëdijes për sigurinë në trafik, për shkak të numrit në rritje të incidenteve me pasoja tragjike.
