Ministri ekstremist izraelit: Gaza dhe banorët e saj duhet të mbyten në det
Në një deklaratë të rëndë dhe alarmante që ka ngjallur zemërim ndërkombëtar, ministri izraelit i Trashëgimisë, Amichai Eliyahu, ka kërkuar asgjësimin total të Gazës dhe banorëve të saj. Në deklaratën e tij, Eliyahu shpreh hapur synime gjenocidale dhe flet me gjuhë të urrejtjes ekstreme ndaj palestinezëve.
Deklarata e plotë e ministrit Amichai Eliyahu:
“Gaza dhe banorët e saj duhet të mbyten në det. Nuk na interesojnë robërit izraelitë dhe nuk na bëhet vonë për njohjen e Palestinës nga bota apo për deklaratat e tyre. Pasi ta kemi mbytur Gazën dhe popullin e saj, do ta bëjmë atë një tokë hebraike.”
Kjo deklaratë vjen në një kohë kur sulmet izraelite në Rripin e Gazës kanë shkaktuar dhjetëra mijëra viktima, shumica prej tyre civilë dhe fëmijë. Fjalët e Eliyahu-t konfirmojnë frikën e shumë vëzhguesve ndërkombëtarë se qëllimi i ofensivës ushtarake nuk është vetëm “çmilitarizimi” i Hamasit, por spastrimi total etnik i popullsisë palestineze dhe kolonizimi i mëtejshëm i territorit.
Organizatat për të drejtat e njeriut dhe përfaqësues politikë në rajon dhe botë kanë dënuar me forcë retorikën ekstreme të ministrit izraelit, duke e cilësuar atë si thirrje të qartë për gjenocid.
Sipas analistëve, një deklaratë e tillë nuk është thjesht një provokim individual, por pasqyron ideologjinë e një pjese të elitës politike në pushtet në Izrael, e cila synon aneksimin e plotë të Gazës dhe spastrimin e saj nga popullsia palestineze.
Kjo deklaratë ka ngritur alarmin për një nevojë urgjente të presionit ndërkombëtar për ndalimin e menjëhershëm të luftës dhe për hetime për krime të mundshme kundër njerëzimit.
