38 zjarre të regjistruara në 24 orët e fundit, tre ende aktive

Qendra për Menaxhim me Kriza informon se gjatë 24 orëve të fundit në territorin e shtetit janë regjistruar gjithsej 38 zjarre në ambiente të hapura. Prej tyre, tre janë ende aktive, pesë janë vënë nën kontroll, ndërsa tridhjetë janë shuar plotësisht.

Zjarre aktive janë regjistruar në Komunën e Dojranit (fshati Nikoliç), Veles (fshati Xhidimirci) dhe në Komunën e Makedonski Brodit, ku zjarri përfshin hapësirën mes fshatrave Çreshnevo, Krapa dhe Lokvicë.

Nën kontroll janë zjarret pranë fshatit Slatinë në Makedonski Brod, fshatit Bllace në Çuçer Sandevo, dy deponi në Komunën e Dollnenit si dhe në zonën e burimeve të Slatinës.

Ndër zjarret e shuara janë ato në Shkup, Manastir, Prilep, Resnje, Demir Hisar, Strumicë, Radovish, Kumanovë, Kriva Pallankë dhe komuna të tjera, ku kryesisht janë përfshirë vegjetacion i ulët, pyje, deponi apo mbeturina.

Shërbimet kompetente vazhdojnë ndërhyrjet në terren dhe apelojnë për kujdes dhe raportim të menjëhershëm të çdo zjarri të vërejtur.