Ambasadori i Izraelit në SHBA: Jemi “afër” një armëpushimi në Liban
Ambasadori i Izraelit në Washington, Michael Herzog deklaroi se janë “afër” arritjes së armëpushimit mes Tel Avivit dhe Hezbollahut në Liban, transmeton Anadolu.
Në deklaratën e tij për radion e ushtrisë izraelite, ambasadori Herzog komentoi negociatat për arritjen e një armëpushimi midis Tel Avivit dhe Hezbollahut në Liban.
Duke deklaruar se ishin “afër” arritjes së një armëpushimi në Liban, Herzog tha se një marrëveshje mund të arrihet “brenda pak ditësh”.
Ai theksoi se megjithëse janë afër një armëpushimi, disa detaje ende nuk janë rënë dakord.
Nga ana tjetër, mediat izraelite raportojnë se qeveria e Tel Avivit “aprovoi në parim” projektin e armëpushimit në Liban, por disa çështje ende nuk janë zgjidhur.
Këshilltari i lartë i presidentit amerikan Joe Biden, Amos Hochstein, vizitoi Libanin dhe Izraelin javën e kaluar si pjesë e negociatave për arritjen e një armëpushimi në Liban.
Hochstein deklaroi në Bejrut më 20 nëntor se ishte bërë përparim në negociatat për armëpushim.
