Izraeli vret liderin e Hamasit
Ismail Haniyeh, udhëheqësi më i lartë politik i Hamasit, u vra në Teheran, njoftoi Hamasi herët këtë të mërkurë.
Një deklaratë e Hamasit tha se “Haniyeh vdiq si rezultat i një sulmi tinëzar sionist në rezidencën e tij në Teheran, pasi mori pjesë në ceremoninë e inaugurimit të presidentit të ri iranian”.
Garda Revolucionare e Iranit konfirmoi atentatin, i cili u raportua nga TV shtetëror iranian herët këtë mëngjes, dhe analistët gjithashtu pretendojnë se Izraeli e vrau Haniyeh, sipas AP.
Ushtria izraelite tha gjithashtu se avionët luftarakë të forcave ajrore izraelite vranë komandantin më të lartë ushtarak të Hezbollahut dhe kreun e njësisë së tij strategjike, Fuad Shukr, i njohur gjithashtu si “Sayyid Muhsan”, në zonën e Bejrutit.
Izraeli ka heshtur për vdekjen e Haniyeh, me mediat atje që raportojnë se zyra e kryeministrit Benjamin Netanyahu ka urdhëruar ministrat të mos komentojnë. Megjithatë, ministri i Trashëgimisë së ekstremit të djathtë Amihai Elihayu, festoi vdekjen e udhëheqësit të Hamasit në Platformën X.
“Vrasja e bën botën pak më të mirë”, shkroi ai në hebraisht.
Ndërsa në një reagim nga Turqia, Ministria e Punëve të Jashtme atje dënoi vrasjen “e tmerrshme” të liderit të Hamasit, Ismail Haniyeh, duke thënë se “tregon edhe një herë se qeveria e Netanyahut e Izraelit nuk ka ndërmend të arrijë paqen” dhe “rajoni do të përballet me konflikt shumë më të madh nëse komuniteti (ndërkombëtar) nuk ndërmerr veprime për të ndaluar Izraelin”.
